ក្រុមការពារតំណែងជើងឯកពានរង្វាន់អឺរ៉ូ អេស្ប៉ាញបានបំបាក់ជម្រើសជាតិទួរគីយ៉ាងចាស់ដៃ ៣-០ ដើម្បីកក់កៅអីវគ្គ១៦ក្រុមចុងក្រោយ។
ការយកឈ្នះយ៉ាងច្រើនគ្រាប់ ធ្វើឲ្យអេស្ប៉ាញបានក្លាយជាក្រុមដំបូងគេដែលអាចស៊ុតបញ្ចូលទី គូ ប្រកួតលើសពី២គ្រាប់នៅអឺរ៉ូលើកនេះ។ ៣គ្រាប់របស់អេស្ប៉ាញធ្វើបានដោយកីឡាករ Morata ខ្សែប្រយុទ្ធ Juventus ២គ្រាប់ម្នាក់ឯងនៅនាទី ៣៤ និង៤៨ ខណៈ១គ្រាប់ទៀតស៊ុតបញ្ចូលទីដោយ ខ្សែបម្រើNolito នៅនាទី៣៧។
លទ្ធផលមួយគូទៀតសាធារណរដ្ឋឆេក ស្មើគ្នា ២ទល់នឹង២ ជាមួយ ក្រុមជម្រើសជាតិក្រូអាត។ ២គ្រាប់របស់ឆេក ស៊ុតបញ្ចូលទីដោយ កីឡាករSkoda នៅនាទី៧៥ និង Necid នៅនាទី៨៩ ហើយ ២គ្រាប់របស់ក្រូអាតរកបានដោយកីឡាករPerisic នៅនាទី៣៧ និងRakitic នាទី៥៩៕
