ក្រុមមេឃខៀវ Manchester City លើកពាន League Cup ឬ Capital One Cup លើកទី៤ក្នុងប្រវត្តិសាស្ត្រក្លឹប បន្ទាប់ពីយកឈ្នះលើហង្សក្រហម Liverpool ដោយបាល់ប៉េណាល់ទីកាត់សេចក្ដី ៣-១ ក្រោយបញ្ចប់លទ្ធផល ១-១ នៅម៉ោងបន្ថែម១៥នាទី២ដង ខណៈដែលអ្នកចាំទី Willy Caballero គឺជា Hero របស់ក្រុមលោក Manuel Pellegrini។
ក្នុងការប្រកួតដ៏កក្រើកនាកីឡដ្ឋានជាតិអង់គ្លេស Wembley ក្រុមមេឃខៀវ បាននាំមុខ ១-០ មុននៅនាទី៤៩ ដោយការស៊ុតរបស់ Fernandinho ប៉ុន្តែនៅចុងម៉ោងនាទី៨៣ Philippe Coutinho បានស៊ុតគ្រាប់តាមស្មើ ១-១ ឲ្យ Liverpool មានសង្ឃឹមវិញ។ លទ្ធផល ១-១ នេះ បានបន្តរហូតចប់ម៉ោងបន្ថែម១៥នាទី២ដងទៀត។
ចំណែកការស៊ុតបាល់ប៉េណាល់ទីកាត់សេចក្ដី Liverpool ស៊ុតបានតែ១គ្រាប់ប៉ុណ្ណោះ ដោយ Emre Can ខណៈដែល Lucas, Coutinho និង Adam Lallana ត្រូវអ្នកចាំទី Caballero សង្គ្រោះបានទាំង៣។ រីឯ Man City ខ្សែបម្រើ Fernandinho ស៊ុតបុកបង្គ្រោលទីគ្រាប់ដំបូង មុនពេលសម្រេច៣គ្រាប់វិញ ដោយ Jesus Navas, Sergio Aguero និង Yaya Toure ស៊ុតគ្រាប់ជ័យជម្នះ។
លទ្ធផលនេះ មានន័យថា Man City លើកពាន League Cup ៤ដងហើយ (១៩៧០, ១៩៧៦, ២០១៤, ២០១៦) ខណៈដែល Liverpool ចាញ់វគ្គផ្ដាច់ព្រ័ត្រ ៤ដង (១៩៧៨, ១៩៨៧, ២០០៥, ២០១៦)។ រីឯ អ្នកចាត់ការហង្សក្រហម Jurgen Klopp ដឹកនាំក្រុមដល់ផ្ដាច់ព្រ័ត្រ Cup ៥រដូវកាលចុងក្រោយ ក្នុងនាមជាអ្នកចាត់ការ ប៉ុន្តែក្នុងនោះចាញ់៤ដងចុងក្រោយ៕
