កីឡាករ Lionel Messi បាននិយាយពីអារម្មណ៍ផ្ទាល់ខ្លួនថា តាំងពីចូលលេងនៅឈុតធំក្រុម Barcelona មក មិនមានខ្សែប្រយុទ្ធណាល្អជាង Luis Suarez និង Neymar នោះទេ។
Messi , Suarez និង Neymar រដូវកាលនេះបានរកគ្រាប់បាល់បាន១២០គ្រាប់ហើយ ពោលគឺ៣នាក់នេះបានបំបែកកំណត់ត្រារកគ្រាប់បាល់បានច្រើនជាងគេ ក្នុងប្រវត្តិសាស្ត្ររបស់ក្រុមអ្នកមានបុណ្យ ដែលកាលពីមុន Messi , Thierry Henry និង Samuel Eto’o រកបាន១០០គ្រាប់កាលពីរដូវកាល ២០០៨-២០០៩ ។ មួយវិញទៀត មហិច្ឆតារបស់ MSN រដូវកាលនេះក៏មិនទាន់អស់នៅឡើយទេ ដោយពួកគេរំពឹងយ៉ាងខ្ពស់ថានឹងអាចលើកពាន៣រដូវកាលនេះ ព្រោះមានពាន២ក្នុងដៃរួចទៅហើយ La Liga , Copa del Rey នៅឡើយតែ UEFA Champions League ដែលត្រូវប៉ះ Juventus នៅថ្ងៃសៅរ៍សប្ដាហ៍នេះ។
ដោយសារតែការសប្បាយចិត្តនេះដែរ ខ្សែប្រយុទ្ធជម្រើសជាតិអាហ្សង់ទីនខាងលើបានប្រាប់ទៅ Squawka ថា៖ “ខ្ញុំពិតជាសំណាងណាស់។ ខ្ញុំធ្លាប់បានលេងជាមួយខ្សែប្រយុទ្ធខ្លាំងជាច្រើននៅ Barca ប៉ុន្មានឆ្នាំមកនេះ ដូចជា Ronaldinho , Samuel Eto’o , Thierry Henry , Pedro , David Villa, Alexis Sanchez ជាដើម ប៉ុន្តែពិតជាពិបាកណាស់ដែលនិយាយថាពួកគេល្អដូច Suarez និង Neymar ។ កីឡាករ២នាក់នេះ មានទម្រង់លេងល្អខ្លាំងណាស់។ យើងទើបតែលេងជាមួយគ្នាបាន១រដូវកាលទេ តែយើងយល់ចិត្តគ្នាណាស់”។
ខ្សែប្រយុទ្ធជម្រើសជាតិប្រេស៊ីលមកចូលលេងជាមួយ Barcelona តាំងពីឆ្នាំ២០១៣មក ដូច្នេះរូបគេបានលេងជាមួយ Messi ២រដូវកាលមកហើយ ប៉ុន្តែខ្សែប្រយុទ្ធជម្រើសជាតិអ៊ុយរុយហ្គាយវិញទើបតែផ្លាស់មករដូវ កាលនេះទេ ហើយមានបម្រាមជាប់ខ្លួនជិតពាក់កណ្ដាលរដូវកាលទៀត ។ តែទោះជាយ៉ាងនេះក្ដី រូបគេនៅតែអាចចុះសម្រុងជាមួយគ្នាបានយ៉ាងល្អ និងលេងស៊ីចង្វាក់គ្នាទៀតផង៕
