កំពូល តារាបាល់ទាត់ឆ្នើមពិភពលោក២រូប Cristiano Ronaldo របស់ក្លិប Real Madrid និង Zlatan Ibrahimovic របស់ PSG ហាក់ចង់ប្រជែងគ្នា ក្នុងការលក់ទឹកអប់រៀងៗខ្លួន ពោលគឺកីឡាករទាំង២ បានប្រកាសថា នឹងចេញលក់ទឹកអប់នៅពេលឆាប់ៗខាងមុខដូចគ្នា។
កាលពីថ្ងៃចន្ទ កីឡាករជម្រើសជាតិស៊ុយអែត Zlatan បានបង្ហោះរូបថតទឹកអប់ថ្មីរបស់ខ្លួនលើ Instagram ហើយសរសេរថា៖ “នេះជាលទ្ធផល២ឆ្នាំ បន្ទាប់ពីការខិតខំប្រឹងប្រែង ដើម្បីផលិតទឹកអប់ ដំបូងរបស់ខ្ញុំ។ នេះជារូបរាងរបស់វា! នឹងចេញលក់នាថ្ងៃទី១២ ខែសីហា”។
រីឯកីឡាករជម្រើសជាតិព័រទុយហ្គាល់ CR7 ក៏បានបង្ហោះរូបថត១សន្លឹករបស់ខ្លួនលើ Twitter ផងដែរ កាលពីថ្ងៃទី១៨ ខែមិថុនា ដោយមានសរសេរជាសារខ្លីថា៖ “ខ្ញុំនឹងចេញទឹកអប់ផ្ទាល់ខ្លួនរបស់ខ្ញុំ នៅចុងរដូវក្ដៅនេះ។ រំភើបខ្លាំងណាស់! ព័ត៌មានលំអិតនឹងចេញឆាប់ៗ!”។
យ៉ាងណាមិញ គេមិនទាន់អាចព្យាករបានទេថា ពេលទឹកអប់របស់ម្ចាស់ពាន Ballon D’Or ៣សម័យកាល និងទឹកអប់របស់កំពូលខ្សែប្រយុទ្ធ Zlatan ចេញលក់ មួយណានឹងលក់ដាច់ជាង ដូច្នេះយើងនឹងរង់ចាំមើលទាំងអស់គ្នា ពេលដែលចេញលក់ផ្លូវការ៕
