នៅ ក្នុងពិធីប្រគល់ពានរង្វាន់ប្រចាំឆ្នាំរបស់ក្របខ័ណ្ឌលីក កំពូលអេស្ប៉ាញ La Liga កាលពីថ្ងៃចន្ទម្សិលមិញនេះ ក្រុម Barcelona បានក្ដោបយកពានច្រើនជាងគេ តាមពីក្រោយដោយគូប្រជែង Real Madrid។ អ្វីដែលគួរឲ្យចាប់អារម្មណ៍នោះ គឺក្រុមខ្លាំងទាំង២ ឈ្នះ២តំណែងដូចគ្នា ក្នុងពានប្រចាំតំណែងទាំង៤ គឺ អ្នកចាំទី, ខ្សែការពារ, ខ្សែបម្រើ និងខ្សែប្រយុទ្ធល្អបំផុតប្រចាំរដូវកាល ២០១៤-២០១៥។
Bravo ឈ្នះពានអ្នកចាំទីល្អបំផុត
Ramos ឈ្នះពានខ្សែការពារល្អបំផុត
James Rodriguez ឈ្នះពានខ្សែបម្រើល្អបំផុត
Messi ឈ្នះពានខ្សែប្រយុទ្ធល្អបំផុត
Claudio Bravo របស់ Barca បានក្លាយជាអ្នកចាំទីល្អបំផុតសម្រាប់រដូវកាលកន្លងទៅ ស្របពេលមិត្តក្រុម Lionel Messi ជាប់ជាខ្សែប្រយុទ្ធល្អបំផុត។ ចំណែកកីឡាករ Real Madrid ២រូប គឺខ្សែការពារប្រធានក្រុម Sergio Ramos និងខ្សែបម្រើ James Rodriguez ជាប់ជាខ្សែការពារ និងខ្សែបម្រើល្អបំផុត។
ងាកទៅមើលពានរង្វាន់ធំជារួមវិញ គឺពានកីឡាករល្អបំផុត (La Liga’s best player of 2014-15) បានទៅ Lionel Messi និងពានគ្រូបង្វឹកល្អបំផុតបានទៅលោក Luis Enrique គ្រូបង្វឹកដែលជួយឲ្យ Barca ឈ្នះជើងឯក La Liga។
ក្រៅពីពានខ្សែប្រយុទ្ធល្អបំផុត Messi ក៏ជាម្ចាស់ពានកីឡាករល្អបំផុតនៅ La Liga ដែរ
ចំណែកដៃគូប្រយុទ្ធរបស់ Messi គឺខ្សែប្រយុទ្ធសាំបាប្រេស៊ីល Neymar Jr បានជាប់ជាកីឡាករទ្វីបអាមេរិកឡាទីន ដែលលេងបានល្អជាងគេ ស្របពេលខ្សែបម្រើ Sofiane Feghouli មកពី Valencia គ្រងតំណែងជាកីឡាករទ្វីបអាហ្វ្រិកដែលលេងបានល្អជាងគេនៅ La Liga ។
Neymar ជាប់ជាកីឡាករអាមេរិកឡាទីនល្អជាងគេនៅ La Liga
ចំពោះ Cristiano Ronaldo វិញ ក៏បានឈ្នះពានរង្វាន់មួយដែរ គឺកីឡាករល្អប្រចាំឆ្នាំដែលបោះឆ្នោតដោយអ្នកគាំទ្រនៅតាមបណ្ដាញ សង្គម ប៉ុន្តែរូបគេមិនបានមកចូលរួមក្នុងពិធីទទួលពានរង្វាន់នោះទេ៕