“Ant-Man” រក​ចំណូល​បាន​លើស​គេ​លើ Box Office ពីរ​សប្ដាហ៍​ជាប់​គ្នា

ភាពយន្ត ​មនុស្ស​ស្រមោច “Ant-Man” របស់ Marvel ដែលជា​ភាពយន្ត​​លេខ​មួយ​កាល​ពី​សប្ដាហ៍​មុន នៅ​តែ​រក​ចំណូល​បាន​ខ្ពស់​ជាង​គេ​ដដែល​លើ តារាង Box Office អាមេរិក​សប្ដាហ៍​នេះ។

នៅ​សប្ដាហ៍​ទី​ពីរ​របស់​ខ្លួន “Ant-Man” អាច​រក​ចំណូល​បាន ២៤,៧លាន​ដុល្លារ នៅ​សហរដ្ឋ​អាមេរិក ​​បើ​ប្រៀបធៀប​នឹង​ចំណូល​សប្ដាហ៍​ដំបូង​គឺ​ធ្លាក់​ចុះ ៥៦,៧ភាគរយ។ សរុប​ទាំង​ចំណូល​ពី​ប្រទេស​ផ្សេង​ៗ​ទៀត ខ្សែ​ភាពយន្ត​បែប​វិទ្យាសាស្ត្រ​មួយ​នេះ​អាច​រក​បាន ២២៦,៤លាន​ដុល្លារ ដែល​ជា​ចំនួន​តិចតួច​បើ​ប្រៀបធៀប​នឹង​រឿង​មុន​ៗ​របស់​ស្ទូឌីយោ Marvel ដូច​ជា​ “Avengers”, និង “Guardians of the Galaxy” ជា​ដើម។

ចំណាត់ថ្នាក់​លេខ​ពីរ​សប្ដាហ៍​នេះ​គឺ​ខ្សែ​ភាពយន្ត​ថ្មី​មាន​ចំណងជើង​ថា “Pixels”។ រយៈ​ពេល​៣​ថ្ងៃ​ដំបូង​របស់​ខ្លួន ភាពយន្ត​គំនូរជីវចល​បែប​កំប្លែង​មួយ​នេះ​អាច​រក​បាន ២៤លាន​ដុល្លារ ដែល​ទាប​ជាង​ឆ្ងាយ​​ការ​រំពឹង​ទុក​របស់​ក្រុម​ផលិតករ។

ខ្សែ​ភាពយន្ត​តុក្កតា “Minions” បាន​ជាប់​ចំណាត់ថ្នាក់​លេខ​៣​សប្ដាហ៍​នេះ​ដោយ​អាច​រក​ចំណូល​បាន ២២,១លាន​ដុល្លារ​កំឡុង​ពេល​៣ថ្ងៃ​នៃ​ចុង​សប្ដាហ៍​មុន។ សរុប​ចំណូល​ទាំង​នៅ​អាមេរិក​និង​ប្រទេស​ផ្សេង​ៗ ភាពយន្ត​នេះ​អាច​រក​បាន ៧៦០លាន​ដុល្លារ​ហើយ​ ក្នុង​រយៈ​ពេល​៣សប្ដាហ៍​មក​នេះ។​

ខាង​ក្រោម​នេះ​គឺ​ជា​ចំណាត់​ថ្នាក់​កំពូល​ទាំង ១០​លើ​តារាង​ចំណូល​ភាពយន្ត Box Office នៅ​អាមេរិក​សប្ដាហ៍​នេះ (ចំណូល​ចុង​សប្ដាហ៍​គិត​ចាប់​ពី​ថ្ងៃ​ទី​២៤-២៦ខែ​កក្កដា)៖

ល.រ	ចំណង​ជើង​ភាពយន្ត	ចំណូល​ចុង​សប្ដាហ៍	ចំណូល​សរុប	សប្ដាហ៍​ទី
១	Ant-Man	២៤,៧លាន​ដុល្លារ	១០៦​លាន​ដុល្លារ	២
២	Pixels	២៤​លាន​ដុល្លារ	២៤​លាន​ដុល្លារ	១
៣	Minions	២២,១​លាន​ដុល្លារ	២៦១,៦​លាន​ដុល្លារ	៣
៤	Trainwreck	១៧,៣​លាន​ដុល្លារ	៦១,៥​លាន​ដុល្លារ	២
៥	Southpaw	១៦,៥​លាន​ដុល្លារ	១៦,៥​លាន​ដុល្លារ	១
៦	Paper Towns	១២,៥​លាន​ដុល្លារ	១២,៥​លាន​ដុល្លារ	១
៧	Inside Out	៧,៣​លាន​ដុល្លារ	៣២០,៣​លាន​ដុល្លារ	៦
៨	Jurassic World	៦,៩​លាន​ដុល្លារ	៦២៣,៨​លាន​ដុល្លារ	៧
៩	Mr. Holmes	២,៨​លាន​ដុល្លារ	៦,៤​លាន​ដុល្លារ	២
១០	Terminator: Genisys	២,៤​លាន​ដុល្លារ	៨៥,៦​លាន​ដុល្លារ	៤

Wednesday, July 29, 2015