អាពាហ៍ពិពាហ៍សត្វសុនខ រ៉ូបមានតម្លៃដល់ខ្ទង់ពាន់ដុល្លារ

ពិធី រៀបអាពាហ៍ពិពាហ៍របស់សត្វសុនខមួយគូ បានរៀបចំឡើងយ៉ាងអធិកអធមនៅប្រទេសអូស្ត្រាលី ដែលគ្រាន់តែឈុតរៀបការសម្រាប់សុនខជាកូនក្រមុំ មានតម្លៃដល់២០០០ដុល្លារអូស្ត្រាលី (ប្រហែល១៦០០ដុល្លារអាមេរិក)។

សត្វសុនខជាកូនកម្លោះកូនក្រមុំ ដែលមានឈ្មោះថា Jasper និង Jasmine នោះ បានបណ្ដើរគ្នាយ៉ាងសង្ហានៅលើកម្រាលព្រំក្រហមមិនចាញ់មនុស្សនោះ ទេ នៅក្នុងពិធីអាពាហ៍ពិពាហ៍សប្បុរសធម៌ដែលធ្វើឡើងនៅរដ្ឋ Victoria ប្រទេសអូស្រ្ដាលីនោះ។

ពិធីរៀបការនេះត្រូវបានរៀបចំដោយអង្គការជួយសង្គ្រោះសត្វសុនខ Pug Rescue and Adoption Victoria និងមានការចូលរួមពីអ្នកចូលចិត្តសុនខ ចំនួន៣៥០នាក់ អមជាមួយសត្វសុនខជាង៦០ក្បាលផងដែរ។

បើតាមអ្នករៀបចំ បានឲ្យដឹងថាពិធីនេះរៀបចំបានយ៉ាងរលូនបើទោះបីជាសត្វសុនខដែល ស្លៀកឈុតទាន់សម័យមានអារម្មណ៍ភ័យខ្លាចបន្តិចក៏ដោយ។ ហើយអ្វីដែលជាពិសេសនោះគឺនៅពេលដែលសុនខញី Jasmine ស្លៀកឈុតកូនក្រមុំដើរចុះមកផ្លូវប្រារព្ធពិធី ក៏មានសត្វសុនខជាច្រើនបានស្ទុះមកមើលផងដែរ៕