Manny Pacquiao កំពុងតែមានបញ្ហាធំហើយ បន្ទាប់ពីមានអ្នកគាំទ្រ២នាក់បានដាក់ពាក្យបណ្ដឹងទារសំណង់៥លាន ដុល្លារពីបទកីឡាកររូបនេះឡើងវាយទាំងមានរបួសខុសលក្ខខ័ណ្ឌ ហើយមួយទៀតខាងអ្នករៀបចំការប្រកួតក៏ចោទប្រកាន់រូបលោកពីបទ ឆ្លើយចម្លើយមិនពិតក្នុងក្រដាសសំនួរមុនប្រកួតផងដែរ។
កាលពីម្សិលមិញនេះ ខាងអ្នករៀបចំការការប្រកួតបានចោទប្រកាន់ Pacquiao ពីបទលាក់បាំងករណីរបួសស្មាមុនឡើងប្រកួតជាមួយ Floyd Mayweather កាលពីថ្ងៃអាទិត្យកន្លងទៅនេះ។ ហើយប្រសិនបើរកឃើញថាកីឡាករហ្វីលីពីនរូបនេះពិតជាមានបំណងលាក់ បាំងមែននោះ រូបគេអាចប្រឈមនឹងការជាប់ពន្ធនាគាររហូតដល់ទៅ៤ឆ្នាំឯណោះ។ តែទោះជាយ៉ាងនេះក្ដី ក្រុមការងាររៀបចំការប្រកួតខាងលើនេះ កំពុងតែស្វែងរកការពិតនៅឡើយ ដូច្នេះរឿងនេះមិនទាន់សម្រេចថាយ៉ាងណានោះទេ។
រឿងលាក់បាំងរបួសស្មានេះដែរ មានអ្នកគាំទ្រ២នាក់នៅទីក្រុង Las Vegas បានដាក់ពាក្យបណ្ដឹងរួចជាស្រេចហើយ ដើម្បីទារសំណង់ប្រាក់៥លានដុល្លារមកវិញ ពីបទកីឡាករហ្វីលីពីនរូបនេះ ឡើងវាយទាំងមានរបួស ទើបធ្វើឱ្យចាញ់ការប្រកួត និងព្យាយាមលាក់បាំងអ្នកគាំទ្រដែលចំណាយលុយរាប់ម៉ឺនដុល្លារចូល ទស្សនាការប្រកួត។
នេះសរបញ្ជាក់ឱ្យឃើញថា ក្រោយពីចប់ការប្រកួតធំជាងគេក្នុងប្រវត្តិសាស្ត្រនេះមក Manny Pacquiao មានរឿងមិនចេះចប់នោះទេ ពោលគឺរូបគេមានបញ្ហារបួសសាច់ដុំស្មាធ្ងន់ធ្ងរត្រូវវះកាត់ហើយ ថែមទាំងមានអ្នកគាំទ្រនិងអ្នករៀបចំការប្រកួតចង់ប្ដឹងថែមទៀត។
