អ្នក ជំនាញធ្លាប់បានបង្ហាញមកហើយថា ការដាក់ទូរសព្ទនៅក្នុងហោប៉ៅខោ គឺធ្វើឲ្យមេជីវិតចុះខ្សោយជា ពិសេសបុរសៗ។ ប៉ុន្តែឥលូវនេះមានការបង្កើតនូវសម្បកទូរសព្ទថ្មី ដែលអាចទប់ស្កាត់បញ្ហានេះបាន។
ក្រុមហ៊ុនមួយមានឈ្មោះ WaveWall បានផលិតសម្បកទូរសព្ទមួយប្រភេទ ដែលអាចការពារមេជីវិតពីជាតិវិទ្យុសកម្មដែលសាយភាយពីទូរសព្ទបាន ៨៥ភាគរយ។ ផ្នែកម្ខាងនៃសម្បកទូរសព្ទនេះមានបំពាក់នូវស្រទាប់ការពារពិសេស អាចស្រូបយកនូវជាតិវិទ្យុសកម្មដែលបញ្ចេញពីទូរសព្ទ។
អ្នកបង្កើតសម្បកទូរសព្ទនេះបានអះអាងថា សម្បកទូរសព្ទនេះនឹងមិនមានផ្ដល់ផលប៉ះពាល់អ្វីចំពោះការចាប់យក សេវារបស់ទូរសព្ទនោះទេ។ នេះក៏ដោយសារតែ ក្រៅពីផ្នែកដែលប្រើស្រទាប់ការពារពិសេស គឺផ្នែកដទៃទៀតសុទ្ធតែធ្វើឡើងពីស្បែកធម្មតាទាំងអស់។ ក្រៅពីការពារជាតិវិទ្យុសកម្ម វាក៏អាចការពារទូរសព្ទពីការប៉ះទង្គិច និងការឆ្កូតបានផងដែរ។
លោក Gardiner ដែលជាគ្រូពេទ្យជំនាញប្រចាំក្រុមហ៊ុន WaveWall បានមានប្រសាសន៍ថា “នេះជាផលិតផលដ៏ល្អមួយសម្រាប់បុរស ប្រសិនបើពួកគេមិនចង់បាត់បង់ឱកាសមានកូនទេនោះ”។
សូមបញ្ជាក់ថា សម្បកទូរសព្ទនេះមានបួនពណ៌ឲ្យជ្រើសរើសគឺពណ៌ខ្មៅ ពណ៌ខៀវ ពណ៌បៃតង និង ពណ៌ក្រហម ចំពោះតម្លៃវិញគឺប្រមាណ ៤០ដុល្លារ៕