អ្នកចាត់ការ Louis van Gaal បានលើកឡើងថា ការទិញយកខ្សែប្រយុទ្ធ Pedro រហស្សនាម “បិសាចល្បឿន” នឹងជួយឲ្យក្រុមបិសាចក្រហម Manchester United អាចប្រជែងយកពានរង្វាន់ English Premier League រដូវកាលថ្មីនេះបាន។
Man Utd ជឿជាក់ថា នឹងអាចទិញយកកីឡាករក្រុម Barcelona រូបនេះបានឆាប់ៗ ដើម្បីជំនួសតំណែង Angel di Maria ដែលជិតផ្ទេរទៅកាន់ក្លិបបារាំង Paris Saint Germain ស្ទើរតែផ្លូវការហើយ។
អ្នកចាត់ការសញ្ជាតិហុល្លង់ ជឿថាការទិញយកកីឡាករជម្រើសជាតិអេស្ប៉ាញ នឹងជួយឲ្យក្រុមរបស់លោកខ្លាំងមួយកម្រិតទៀត ដោយលោកនិយាយថា៖ “Barcelona មានកីឡាករល្បឿនលឿនដូចជា Neymar និង Messi ហើយពួកគេមាន Pedro នៅពីក្រោយទៀត។ យើងអាចឈ្នះពានរង្វាន់ បើអាចទិញកីឡាករល្បឿនលឿន និងពូកែញាក់ដូចនេះ។ យើងត្រូវតែអភិវឌ្ឍន៍ក្រុមរបស់យើងដូចនោះដែរ។ ជាក់ស្ដែង ដូចជាក្រុមគូប្រជែងរបស់យើង Chelsea ពួកគេមានកីឡាករលឿនៗ និងពូកែញាក់ដូចជា Hazard, Willian, Oscar ជាដើម”។
ខ្សែប្រយុទ្ធអេស្ប៉ាញដែលចូលលេងឲ្យឈុតយុវជន Barcelona តាំងពីឆ្នាំ២០០៤ និងចូលឈុតធំនៅឆ្នាំ២០០៨ រូបនេះ បានបង្ហាញខ្លួនឲ្យ Barca ២០៤ប្រកួត និងស៊ុតបញ្ចូលទីបាន៥៨គ្រាប់៕
