ខ្សែ បម្រើស្លាបដ៏មានប្រជាប្រិយភាពរបស់ Manchester United កីឡាករ Angel di Maria កាន់តែជិតផ្ទេរទៅកាន់ក្លិបបារាំង Paris Saint Germain ជាផ្លូវការហើយ ដោយកំពុងត្រៀមខ្លួនពិនិត្យសុខភាពនៅទីក្រុង Doha ថ្ងៃចន្ទនេះ។ ម្ចាស់ក្លិប PSG ដែលជាសេដ្ឋីនៅកាតារ បានចុះកុងត្រារយៈពេល៤ឆ្នាំឲ្យកីឡាករអាហ្សង់ទីនរូបនេះ។
Di Maria ដែលពាក់លេខ៧ដ៏ល្បីនៅ Man Utd ត្រូវបានគេជឿថាមានតម្លៃខ្លួន ៤៤,៥លានផោន (៦៩,៥លានដុល្លារអាមេរិក) ក្នុងការផ្ទេរចេញពី Old Trafford ទៅកាន់ Parc des Princes។
Di Maria ធ្វើដំណើរពីអាហ្សង់ទីន ទៅដល់ទីក្រុង Doha ប្រទេសកាតារ ដើម្បីជួបប្រធានក្លិប PSG
អតីតកីឡាកររបស់ Rosario Central, Benfica និង Real Madrid បានចាប់ផ្ដើមយ៉ាងល្អក្រោយផ្ទេរពីពីអេស្ប៉ាញ មកកាន់ទឹកដីអង់គ្លេសជាលើកដំបូង ពោលគឺបានស៊ុតបញ្ចូលទី១គ្រាប់ និង assist ១គ្រាប់ក្នុង៤ប្រកួតដំបូងរបស់ខ្លួន ប៉ុន្តែក្រោយមកទម្រង់លេងរបស់គេបានធ្លាក់ចុះស្ទើរតែពេញមួយរដូវ កាល។ សរុបទៅខ្សែបម្រើវ័យ២៧ឆ្នាំ ដែលធ្លាប់ជាសំណព្វចិត្តអ្នកគាំទ្រ Real រូបនេះ បានបង្ហាញខ្លួន ៣២ប្រកួតនៅគ្រប់ពានរង្វាន់ឲ្យបិសាចក្រហម និងស៊ុតបញ្ចូលទីបាន៤គ្រាប់៕
