ត្រឹម
រយៈពេលដ៏ខ្លីប៉ុណ្ណោះ ក្រុមជ្រុលនិយម (ISIS)
បានវាយកម្ទេចរូបចម្លាក់បុរាណមិនអាចកាត់ថ្លៃបាន
ដែលមានអាយុកាលរាប់ពាន់ឆ្នាំ ខ្ទេចខ្ទីអស់គ្មានសល់។
ពួកគេបានប្រើញញួរ
វាយបំបែកបំផ្លិចបំផ្លាញវត្ថុសិល្បៈនានាដែលមានតម្លៃសម្រាប់មនុស្ស
ជាតិទាំងកម្រោល នៅសារមន្ទីរ Nineveh ភាគខាងជើងក្រុង Mosul
ប្រទេសអ៊ីរ៉ាក់។
រតនសម្បត្តិមួយក្នុងចំណោមវត្ថុសិល្បៈទាំងអស់នោះ គឺជារូបចម្លាក់អាទិទេពការពារ ព្រះគោមានស្លាប Assyrian ដែលមានអាយុកាលតាំងពីសតវត្សទី៩ មុនគ្រិស្តសករាជ ពោលគឺជិត ៣ពាន់ឆ្នាំមកហើយ។ នេះគឺជាបំផ្លិចបំផ្លាញមរតកមនុស្សជាតិដ៏ធំមួយ ដែលពិភពលោកទាំងមូលកំពុងរួមគ្នាថែរក្សា និងអភិរក្សប្រកបដោយការប្រុងប្រយ័ត្ន។
បុរសម្នាក់នៅក្នុងវីដេអូបានបញ្ជាក់ថា រូបចម្លាក់ទាំងនេះត្រូវកម្ទេចចោល ព្រោះវាផ្សព្វផ្សាយពីការគោរពជឿងប់ងុល។ បុរសមិនស្គាល់អត្តសញ្ញាណនោះបាននិយាយបន្តទៀតថា “ព្រះមហាម៉ាត់បានបញ្ជាពួកយើងឲ្យបំផ្លាញរូបចម្លាក់ និងសារីរិកធាតុ ហើយដៃគូរបស់ព្រះអង្គនឹងធ្វើដូចគ្នានៅពេលដណ្ដើមប្រទេសនានា បន្ទាប់ពីព្រះអង្គ”។
អតីតបុគ្គលិកនៅសារមន្ទីរ Nineveh បានរៀបរាប់ប្រាប់ទីភ្នាក់ងារព័ត៌មាន Reuters ថា សារមន្ទីរដែលរងការបំផ្លាញនេះ ត្រូវក្រុមរដ្ឋឥស្លាមជ្រុលនិយមដណ្ដើមកាន់កាប់បានកាលពីខែមិថុនា ឆ្នាំ២០១៤ កន្លងទៅ។ ក្រៅពីវាយកម្ទេច ក្រុមនេះក៏បានលក់វត្ថុសិល្បៈតាមទីផ្សារងងឹត ដើម្បីរកលុយមកផ្គត់ផ្គង់យុទ្ធនាការបង្ហូរឈាមគ្នាផងដែរ។
កាលពីថ្ងៃព្រហស្បតិ៍ម្សិលមិញនេះ ក្រុមភេរវជនដែលកំពុងបង្កការភ័យខ្លាចដល់ពិភពលោកទាំងមូល ក៏បានដុតសៀវភៅប្រហែល ១០០០០ក្បាល និងចំណារដ៏កម្រជាង៧០០ នៅក្នុងបណ្ណាល័យសាធារណៈក្រុង Mosul ឆេះខ្ទេចគ្មានសល់គួរឲ្យសោកស្ដាយ។ សមាជិកមេដឹកនាំម្នាក់ក្នុងក្រុង Mosul បានព្យាយាមទប់ស្កាត់ការបំផ្លាញអគារទាំងមូលដែរ ប៉ុន្តែបរាជ័យ៕
