លោក Zinedine Zidane ដែលជាគ្រូបង្វឹកក្រុម Real Madrid Castilla បាននិយាយថា Eden Hazard គឺជាកីឡាករទី៣ដែលខ្លួនពេញចិត្ត បន្ទាប់ពីកីឡាករ Lionel Messi និង Christiano Ronaldo។
ការលើកឡើងរបស់អតីតវីរបុរស Real Madrid វ័យ ៤៣ឆ្នាំ ធ្វើឡើងស្របពេលដែលក្លិបយក្សរបស់អេស្ប៉ាញ កំពុងទាក់ទង Hazard មកកាន់ទឹកដី Santiago Bernabeu នៅប៉ុន្មានខែចុងក្រោយនេះ។
“បន្ទាប់ពី Ronaldo និង Messi មានតែ Hazard នេះហើយដែលពេញចិត្ត។ អាចនិយាយបានថា ខ្ញុំស្រលាញ់កីឡាករម្នាក់នេះ ហើយចង់ឃើញគាត់លេងឲ្យ Real Madrid។ គ្មានអ្វីត្រូវឆ្ងល់នោះទេ ព្រោះ មិនយូរមិនឆាប់ Hazard នឹងមានទម្រង់លេងល្អឡើងវិញ”។ អតីតប្រធានក្រុមជម្រើសជាតិ បារាំងបន្ថែមដូច្នេះ។
Hazard បានផ្ទេរមកកាន់ទឹកដី Stamford Bridge ក្នុងតម្លៃ៣២ លានផោន កាលពីខែធ្នូ ឆ្នាំ២០១២ ហើយគេក៏ជាម្ចាស់ពានកីឡាករឆ្នើមប្រចាំឆ្នាំនៅក្របខ័ណ្ឌរបស់ អង់គ្លេស (PFA Players’ Player of the Year ) កាលពីរដូវកាលមុនផងដែរ៕
