លេចរូបភាព និងវីដេអូក្រៅឆាកគួរឲ្យចាប់អារម្មណ៍ ពីរឿង James Bond វគ្គថ្មី

រូបភាព និងវីដេអូពីសកម្មភាពថតរឿង “James Bond” វគ្គថ្មី ត្រូវបានបង្ហាញហើយ កាលពីម្សិលមិញ។

សម្រាប់វគ្គថ្មីមានចំណងជើងថា “Spectre” តារាសម្ដែងវ័យ ៤៦ឆ្នាំ Daniel Craig នឹងត្រលប់មកកាន់តំណែងតួ 007 វិញ បន្ទាប់ពីវគ្គមុនដែលមានចំណងជើងថា “Skyfall”។ បច្ចុប្បន្នតារាសម្ដែងរូបនេះ និងក្រុមការងារកំពុងថតភាពយន្តនេះនៅប្រទេសអូទ្រីស។ វគ្គថ្មីនេះ នឹងចេញបញ្ចាំងនៅថ្ងៃទី៦ ខែវិច្ឆិកា ខាងមុខ។

សហការីផលិតភាពយន្ត Gregg Wilson បាននិយាយថា “ពួកយើងនឹងនាំមកនូវវគ្គបន្តដ៏អស្ចារ្យមួយទៀតដែលប្រកបដោយឈុត ឆាកវាយប្រហារកាន់តែប្លែក។ ឈុតឆាកនីមួយៗត្រូវតែមានទស្សនីយភាពស្រស់ស្អាត ហើយយើងគិតថាប្រទេសអូទ្រីសគឺមានគ្រប់យ៉ាងដែលយើងត្រូវការដើម្បី ថតវគ្គនេះ”។

ភាពយន្ត “Spectre” ដែលជាវគ្គទី២៤ នៃភាពយន្តជាស៊េរី “James Bond” មានការចូលរួមសម្ដែងពីតួអង្គក្នុងវគ្គមុនមួយចំនួនទៀតដូចជា Naomi Harris ជាតួ Eve Moneypenny, Ben Whishaw ជាតួ Q និង Ralph Fiennes ជាតួ M, រួមជាមួយតួអង្គថ្មីៗទៀត ដូចជាតារាម៉ូដែលឆ្នាំអ៊ីតាលី វ័យ ៥០ឆ្នាំ Monica Bellucci ជាតួឯកស្រីវ័យចាស់បំផុតក្នុងប្រវត្តិសាស្ត្រភាពយន្ត “James Bond”។

អ្នកនិពន្ធ Neil Purvis និង Rob Wade ដែលបាននិពន្ធរឿង “Skyfall” នឹងត្រលប់មកនិពន្ធវគ្គថ្មីនេះបន្តទៀត ដោយមានលោក Sam Mendes ជាអ្នកដឹកនាំរឿង។

ទស្សនារូបភាព និងវីដេអូដំបូងពីសកម្មភាពថតភាពយន្ត “Spectre”៖