Cristiano Ronaldo បានក្លាយជាកីឡាកររកគ្រាប់បាល់បញ្ចូលទីបានច្រើនជាងគេលំដាប់ ទី៣ក្នុងប្រវត្តិសាស្រ្ដក្លិប Real Madrid បន្ទាប់ពីតែតបាន១គ្រាប់ និងជួយឲ្យក្រុមអធិរាជសឈ្នះក្រុម Elche ២-០ ក្នុងការប្រកួត La Liga សប្ដាហ៍ទី២៤ កាលពីយប់មិញ។
កីឡាករអន្តជាតិព័រទុយហ្គាល់ រកគ្រាប់បញ្ចូលទីបាន ២៩០គ្រាប់សម្រាប់ក្រុម Real ដោយលើ Carlos Santillana ចំនួន១គ្រាប់ និងតាមពីក្រោយកំណត់ត្រាច្រើនជាងគេរបស់ Raul ចំនួន ៣៣គ្រាប់។
ខ្សែប្រយុទ្ធ Karim Benzema បានស៊ុតគ្រាប់ទី១ ឲ្យ Real នាំមុខមុននៅនាទី៥៦ ខណៈដែលនៅនាទី៦៩ Ronaldo តែតបន្ថែម១គ្រាប់ទៀត ក្រោយទទួលបាល់ពី Isco។
ជ័យជម្នះ១នេះ បានជួយឲ្យក្រុមអធិរាជសស្ថិតនៅចំណាត់ថ្នាក់លេខ១ នាំមុខគេ៤ពិន្ទុនៅលើកំពូលតារាង La Liga បន្ទាប់ពីក្រុមលេខ២អ្នកមានបុណ្យ Barca ចាញ់ Malaga ១-០ កាលពីថ្ងៃសៅរ៏៕
