ដូនជីល្បីម្នាក់ឈ្មោះ Lucia Caram បាននិយាយថា Lionel Messi មានអាកប្បកិរិយា និងចិត្ត ស្លូតបូតដូចព្រះ ប៉ុន្តែ Cristiano Ronaldo ក៏មិនអាក្រក់ដល់ថ្នាក់ដូចបិសាចដែរ ទោះជារូបគេមានអាកប្បកិរិយាមិនសូវល្អយ៉ាងណាក៏ដោយ។
ដូនជីមានដើមកំណើតអាហ្សង់ទីន តែមករស់នៅអេស្ប៉ាញអស់ជាង២០ឆ្នាំមកហើយខាងលើ បានប្រាប់ទៅកាសែត Sport ថា៖ “សម្រាប់ខ្ញុំ ព្រះជាម្ចាស់តែងតែមានចិត្តស្លូតបូត មិនចេះខឹងនរណា និងមានចិត្តសន្ដោសប្រណីណាស់ ហើយពេលខ្ញុំមើលទៅ Messi គឺរូបគេក៏ដូចគ្នាដែរ។ មិនត្រឹមតែប៉ុណ្ណោះ សូម្បីតែទឹកមុខរបស់គេក៏មើលទៅស្អាតបាតប្រៀបបានទៅនឹងផ្ទាំងគំនូរឬព្រះអាទិត្យរៀបលេចដែរ។ ខ្ញុំនិយាយនេះគឺមិនមែនថា Messi ជាព្រះនោះទេ ប៉ុន្តែគាត់អាចដើរតាមគន្លងនេះបាន”។
ងាកទៅខាង Ronaldo វិញ ដូនជី Lucia Caram ក៏បាននិយាយដែរថា៖ “Cr7 ពូកែលេងបាល់ខ្លាំងណាស់ ប៉ុន្តែគាត់មានចរិកគឃ្លើន និងឥរិយាបថមិនរស់រាយរាក់ទាក់នោះទេ។ នេះមិនមែនមានន័យថាគាត់ជាបិសាចនោះឡើយ។ គាត់គ្រាន់តែធ្វើយ៉ាងណាឱ្យពូកែលេងបាល់ទាត់ប៉ុណ្ណោះ”។
ការដែលដូនជីខាងលើនិយាយពីកីឡាករទាំងពីរនេះ ត្រូវបានគេមើលឃើញថាមកពីម្ចាស់ពាន Ballon d’Or 2014 ខាងលើបានទទួលកាតក្រហមកាលពីប្រកួតជាមួយ Cordoba ដែលត្រូវខកខានលេងឱ្យ Real Madrid ២ប្រកួត រីឯ Messi វិញ រដូវកាលនេះមានទម្រង់លេងល្អ និងមិនដែលមានទំនាស់អ្វីជាមួយមិត្តរួមក្រុមឡើយ ហើយកាតក្រហមវិញមិនដែលបានឡើយនៅអេស្ប៉ាញ៕
