កីឡាករ Angel di Maria បានប្រាប់ទៅអតីតមិត្តរួមក្រុមនៅ Real Madrid ថាខ្លួនពិតជាសោកស្ដាយណាស់ដែលផ្លាស់មក Manchester United។ នេះបើតាមគេហទំព័រ Metro បានស្រង់សម្ដីកីឡាករជម្រើសជាតិអាហ្សង់ទីនពីទូរទស្សន៍អេស្ប៉ាញ។
Di Maria តាំងពីផ្លាស់ពី Real Madrid មកអង់គ្លេសក្នុងតម្លៃខ្លួនបំបែកកំណត់ត្រានៅ Premier League មក នៅមិនទាន់បានបង្ហាញទម្រង់លេងគួរឱ្យកត់សម្គាល់ដូចនៅអេស្ប៉ាញនៅ ឡើយទេ។ ខណៈដែលពេលនេះក៏មានព័ត៌មានថារូបគេសោកស្ដាយដែលផ្លាស់មក Man Utd ទៀត។ រឿងរ៉ាវនេះដែរ គឺលេចចេញមកពីកាសែតមិនច្បាស់ការមួយនៅអេស្ប៉ាញ ប៉ុន្តែមិនទាន់ប្រាកដថាមួយណានៅឡើយទេ។ ក្នុងឃ្លាដែលកាសែតមួយនោះបានលើកឡើងគឺថា Di Maria បានប្រាប់ទៅអតីតមិត្តភ័ក្ដិនៅ Real Madrid ថារូបគេពិតជាសោកស្ដាយក្នុងការដែលចូលរួមជាមួយបិសាចក្រហម។
កីឡាករវ័យ២៧ឆ្នាំរូបនេះ តាំងពីបើករដូវកាលថ្មីនេះមក ទើបតែរកគ្រាប់បាល់បាន៤គ្រាប់គត់នៅបិសាចក្រហម។ ទន្ទឹមនឹងការធ្លាក់ទម្រង់លេងនេះដែរ ក្រុមយក្សនៅបារាំង PSG កំពុងតែឃ្លាំមើលមែនទែនហើយ ប្រសិនបើ Di Maria មិនអាចជួយ Man Utd ឱ្យឈរនៅ Top 4 បាន ពួកគេនឹងដាក់តម្លៃខ្លួនទិញយកទៅបារាំងភ្លាម៕
