ខ្សែភាពយន្តអំពីសង្គ្រាមលោកលើកទីពីរ រឿង “Fury” ដែលជាស្នាដៃថ្មីរបស់តារាល្បីអាមេរិក Brad Pitt បានមកដល់រោងភាពយន្តនៅកម្ពុជាហើយ បន្ទាប់ពីចេញបញ្ចាំងនៅអាមេរិកបានមួយសប្ដាហ៍ និងដណ្ដើមបានតំណែងលេខ ១លើតារាងចំណូលភាពយន្ត Box Office ក្នុងរយៈពេលត្រឹមតែ៣ថ្ងៃ។
“Fury” គឺជាខ្សែភាពយន្តរៀបរាប់ពីមេទាហានម្នាក់ឈ្មោះ Wardaddy (សម្ដែងដោយ Brad Pitt) ដែលត្រូវដឹកនាំកូនទាហានរបស់ខ្លួនចំនួន ៥នាក់ ដើម្បីចូលវាយលុកបន្ទាយរបស់ក្រុមណាហ្ស៊ីរបស់អាល្លឺម៉ង់ នៅឆ្នាំ១៩៤៥ ដែលជាឆ្នាំចុងក្រោយនៃសង្គ្រាមលោកលើកទី២។ ក្នុងបេសកកម្មមួយនេះ Wardaddy ត្រូវប្រឈមមុខនឹងគ្រោះថ្នាក់ជាច្រើនរាប់មិនអស់ ដែលធ្វើឲ្យគេ និងក្រុមរបស់គេស្ទើរតែអស់ជីវិតម្ដងៗ។
ក្រៅពី Brad Pitt ខ្សែភាពយន្តនេះមានការចូលរួមសម្ដែងពីតារាល្បីៗមួយចំនួនទៀតដូចជា Shia LaBeouf, Logan Lerman, Michael Pena និង Jon Bernthal និងជាស្នាដៃនិពន្ធ និងដឹកនាំដោយលោក David Ayer។ ភាពយន្តនេះបានចាប់ផ្ដើមបញ្ចាំងនៅអាមេរិកកាលពីថ្ងៃទី១៧ ខែតុលា ដែលក្នុងរយៈពេលតែ៣ ថ្ងៃ ភាពយន្តនេះរកចំណូលបាន ២៣,៧លានដុល្លារ ដែលជាចំណូលខ្ពស់បំផុតលើតារាង Box Office សប្ដាហ៍មុន។
អ្វីដែលពិសេស “Fury” នឹងចាប់ផ្ដើមបញ្ចាំងនៅរោងភាពយន្តផ្លាទីនៀម ផ្សារសុរិយា ចាប់ពីថ្ងៃទី២៤ ខែតុលា ខាងមុខនេះហើយ។ ដូច្នេះប្រិយមិត្តដែលចាប់អារម្មណ៍អាចចូលរួមទស្សនាបានទាំងអស់គ្នា។
ទស្សនាឈុតខ្លីៗ៖
