ចង់ដឹងថា តើក្រុមណាខ្លះៗ ដែលប៉ះគ្នាម្តងៗ មានរឿងចម្រូងចម្រាស់មិនចេះចប់ដែរទេ Sabay សូមលើកយក ១០គូដូចខាងក្រោម៖
១. Real Madrid vs Barcelona (អេស្ប៉ាញ)
គូប្រជែងរវាងក្រុម FC Barcelona និង Real Madrid ក្នុងប្រទេសអេស្ប៉ាញ គឺជាគូដ៏សាហាវជាងគេបំផុតនៅក្នុងប្រវត្តិសាស្ត្របាល់ទាត់។ ក្លិបយក្សទាំង២នេះ គឺជាក្លិបដែលធំ និងជោគជ័យជាងគេបំផុតនៅអេស្ប៉ាញ ដូច្នេះពេលប៉ះគ្នាម្តងៗ ពួកគេតែងតែលេងលក្ខណៈកាចៗរៀងៗខ្លួន។
២. Lazio vs Roma (អ៊ីតាលី)
ការប្រកួតក្រុមរួមទីក្រុង (Derby of the capital) គឺជាការប្រកួតដ៏ធំបំផុត ក្នុងទីក្រុង Rome នៃប្រទេសអ៊ីតាលី រវាងក្រុមធំៗទាំង២គឺ Lazio និង Roma។ ការប្រកួតរបស់ក្រុមទាំង២នេះ គេចាត់ទុកថាជា ការប្រកួតដ៏ធំបំផុត នៅប្រទេសអ៊ីតាលី និងជាការប្រកួតដ៏អស្ចារ្យមួយរបស់ទ្វីបអឺរ៉ុបផងដែរ។
៣. Celtic vs Rangers (ស្កុតឡែន)
ការប្រកួតដ៏ធំបំផុតនៅប្រទេសស្កុតឡែន គឺជាការប៉ះគ្នារវាងក្រុមខ្លាំង និងក្រុមខ្លាំង Celtic និង Rangers។ អាចនិយាយបានថា ពេលប៉ះគ្នាម្តងៗ ក្រុមទាំង២នេះ អាចលើសពីបាល់ទាត់ទៅទៀត ពោលគឺ វាអាចទាក់ទងដល់សាសនា នយោបាយ និងជាសត្រូវនឹងគ្នាក្នុងតំបន់ផ្សេងគ្នាថែមទៀត។
៤. Boca Juniors vs River Plate (អាហ្សង់ទីន)
Superclásico គឺជាឈ្មោះដែលប្រើប្រាស់ សម្រាប់ការប្រកួតក្នុងប្រទេសអាហ្សង់ទីន រវាងក្រុម Boca Juniors និង River Plate។ ក្រុមទាំង២នេះ គឺជាក្រុម ដែលមានប្រជាប្រិយភាព និងជោគជ័យបំផុត នៅក្នុងប្រវត្តិសាស្ត្របាល់ទាត់អាហ្សង់ទីន។
៥. Inter Milan vs Juventus (អ៊ីតាលី)
Derby d’Italia គឺជាឈ្មោះដែលក្រុមទាំង២ប៉ះគ្នា នៅក្នុងលីក និងត្រូវបានគេប្រើប្រាស់តាំងពីឆ្នាំ ១៩៦៧មក ដោយការហៅតាមអ្នកកាសែតអ៊ីតាលីម្នាក់ឈ្មោះ Gianni Brera។ Inter Milan និង Juventus គឺជាក្រុមខ្លាំង ដែលធ្លាប់ឈ្នះពានអឺរ៉ុប និងឈ្នះពានលីកអ៊ីតាលីច្រើនជាងគេ។
៦. Liverpool vs Manchester United (អង់គ្លេស)
ប្រវត្តិសាស្ត្ររវាងក្រុមបាល់ទាត់ Liverpool និង Manchester United គឺជាការប្រកួតមួយ ដ៏ធំបំផុតនៅអង់គ្លេស និងពិភពលោក។ ក្រុមខ្លាំងទាំង២នេះ គឺជាក្រុមដែលជោគជ័យជាងគេបំផុត នៅអង់គ្លេស ខណៈដែល Liverpool ធ្លាប់ឈ្នះពានក្នុងលីកបាន ១៨សម័យកាល រីឯ Man Utd ធ្លាប់ឈ្នះបាន ២០សម័យកាល។
៧. AC Milan vs Inter Milan (អ៊ីតាលី)
Milan Derby គឺជាឈ្មោះ ដែលគេសំគាល់សម្រាប់ហៅ ពេលក្រុម Inter Milan និង AC Milan ប៉ះគ្នាម្តងៗ នៅក្នុងក្របខ័ណ្ឌ Serie A។ ក្រុមទាំង២នេះ ធ្លាប់ជាក្រុមខ្លាំងជាងគេនៅអ៊ីតាលីដូចគ្នា និងធ្លាប់ជាក្រុមខ្លាំង នៅ UEFA Champions League ទៀតផង។
៨. Fenerbahce vs Galatasaray (ទួរគី)
Fenerbahçe SK ប្រកួតប៉ះ Galatasaray SK គឺជាការប្រកួតដែលធំបំផុតនៅប្រទេសទួរគី។ ក្រុមទាំង២នេះ គឺជាក្រុមដែលជោគជ័យបំផុត នៅក្នុងក្របខ័ណ្ឌ Süper Lig។
៩. Nacional vs Penarol (អ៊ុយរុយហ្គាយ)
Clásico ដ៏ចំណាស់បំផុតនៃប្រទេសអ៊ុយរុយហ្គាយ តាំងពីសតវត្សទី១៩មក គឺការប៉ះគ្នារវាងក្រុម Nacional និង Peñarol។ ក្រុមទាំង២នេះ គឺជាក្រុមគំរូ ដែលជួយអភិវឌ្ឍន៍ដល់ក្រុមបាល់ទាត់នៃ តំបន់អាមេរិកខាងត្បូងទាំងមូលផងដែរ។
១០. Corinthians vs Palmeiras (ប្រេស៊ីល)
Derby Paulista គឺជាឈ្មោះ ដែលគេហៅសម្រាប់ការប្រកួត រវាងក្រុមនៅទីក្រុង São Paulo ទាំង២គឺ Corinthians ប៉ះ Palmeiras។ វាគឺជាការប្រកួតដ៏ធំ សម្រាប់អ្នកគាំទ្រ នាទីក្រុង São Paulo ក៏ដូចជាអ្នកទស្សនាជុំវិញពិភពលោក។
