ម្ចាស់ ក្លិប Real Madrid លោក Florentino Perez បានចេញមកបញ្ជាក់គោលជំហររបស់ខ្លួនថានឹងមិនដេញលោក Carlo Ancelotti និង Gareth Bale ចេញឡើយ ទោះជាធ្លាក់ទម្រង់លេងប៉ុន្មានប្រកួតមកនេះក៏ដោយ។
កាសែត Marca របស់អេស្ប៉ាញបានចុះផ្សាយកាលពីម្សិលមិញនេះថាលោក Ancelotti អ្នកចាត់ការក្រុម Real Madrid អាចនឹងរបូតតំណែងនៅរដូវក្ដៅខាងមុខ។ ប៉ុន្តែ ម្ចាស់ក្លិបស្ដេចសបានចេញមកប្រាប់ដោយផ្ទាល់តែម្ដងថា៖ “អ្វីដែលព័ត៌មានបានចុះផ្សាយគឺមិនពិតនោះទេ។ ខ្ញុំចង់ប្រាប់អ្នករាល់គ្នាថា ខ្ញុំមានទំនុកចិត្តលើអ្នកចាត់ការ និងកីឡាករទាំងអស់ក្នុងក្លិបរបស់ខ្ញុំ។ ខ្ញុំចង់បញ្ជាក់ឱ្យកាន់តែច្បាស់ទៀតថា ទោះជាថ្ងៃមុខទៅជាយ៉ាងណាក៏លោក Ancelotti នៅតែជាគ្រូបង្វឹកនៅ Real Madrid រហូត”។
បន្ថែមពីលើនេះ បុរសចាយលុយមិនស្ដាយ វ័យ៦៨ឆ្នាំខាងលើ ក៏បាននិយាយពីកីឡាករ Gareth Bale ដែរថា៖ “Bale ជាកីឡាករល្អជាងគេលើលោក។ ក្រុមយើងនឹងស្វែងរកវិធីសាស្ត្រដើម្បីឱ្យខ្សែប្រយុទ្ធរូបនេះលេង ខ្លាំងដូចមុន។ រឿងតែមួយគត់ដែលខ្ញុំចង់និយាយគឺយើងមិនអាចភ្លេចពីអ្វីដែលគាត់ បានធ្វើជូនក្រុមនៅរដូវកាលមុននោះទេ”។
ក្រុម Real Madrid ៣ប្រកួតចុងក្រោយនេះមិនទាន់ស្គាល់ពាក្យថាឈ្នះនោះទេ ខណៈដែលការចាញ់ Schalke 04 កាលពីសប្ដាហ៍មុននោះគឺកាន់តែធ្វើឱ្យអ្នកគាំទ្រមួម៉ៅខ្លាំងថែម ទៀត។ កាលពីពេលថ្មីៗនេះដែរ ក៏មានអ្នកគាំទ្រមួយចំនួនហៅខ្សែប្រយុទ្ធជម្រើសជាតិវែលថាជា ខ្ទើយផងដែរ៕
