បិសាចក្រហមបន្តក្ដីសង្ឃឹម Top 4 ក្រោយស៊ីមាន់ខ្នាយមាសយប់មិញ

ក្រុម បិសាចក្រហម Manchester United នៅតែបន្តក្ដីសង្ឃឹមឈរនៅក្នុងចំណោមក្រុមកំពូលទាំង៤ នៅ Premier League ក្រោយយកឈ្នះក្រុមមាន់ខ្នាយមាស Tottenham Hotspur ៣-០ នៅ Old Trafford យប់មិញនេះ។

ក្រុមលោក Louis van Gaal នៅសល់តែការប្រជែងយកតំណែង Top 4 នេះប៉ុណ្ណោះក្នុងរដូវកាលនេះ ក្រោយធ្លាក់ចេញពី FA Cup កាលពីថ្ងៃចន្ទសប្ដាហ៍មុន។ យ៉ាងណាក្ដី សម្ពាធបានថមថយវិញខ្លះ ក្រោយជ័យជម្នះលើក្រុម Spurs។

ការប្រកួតចាប់ផ្ដើមបានតែ៩នាទី ខ្សែបម្រើបែលហ្សិក Marouane Fellaini បានបំប៉ោងសំណាញ់ទីក្រុមភ្ញៀវបានសម្រេច។ ១០នាទីបន្ទាប់ Michael Carrick បានតែតបន្ថែមមួយគ្រាប់ទៀត មុនពេលប្រធានក្រុម Wayne Rooney ស៊ុតគ្រាប់ទី៣ នៅនាទី៣៤។ លទ្ធផល ៣-០ នៅតង់ទី១ បានរក្សាដល់ចប់ការប្រកួត។

សម្ពាធដណ្ដើម Top 4 នឹងត្រូវធ្លាក់ទៅលើក្រុមគូប្រជែង Liverpool ដែលត្រូវប៉ះ Swansea នៅ Liberty Stadium យប់នេះ។ ក្រោយការប្រកួតនោះ ហង្សក្រហមនឹងត្រូវបើកទ្វារកីឡដ្ឋាន Anfield ស្វាគមន៍ Man Utd នៅថ្ងៃអាទិត្យ ដែលអាចហៅបានថាជាជំនួបដណ្ដើមកៅអីទៅ Champions League រដូវកាលក្រោយក៏ថាបាន៕