Eden Hazard របស់ក្រុម Chelsea បានឈ្នះរង្វាន់កីឡាករល្អដាច់គេប្រចាំឆ្នាំ ប្រចាំទីក្រុងឡុងដុង (London Footballer of the Year) ខណៈដែល Harry Kane របស់ក្រុម Tottenham Hotspur ឈ្នះរង្វាន់កីឡាករល្អវ័យក្មេងប្រចាំឆ្នាំ (London Young Footballer of the Year)។
ខ្សែបម្រើឆ្នើមបែលហ្សិក Hazard បានជួយឲ្យក្រុមតោខៀវ ឈ្នះពាន Capital One Cup កាលពីថ្ងៃអាទិត្យ ក្រោយពីក្រុមរបស់គេយកឈ្នះ ២-០ ទៅលើក្រុមគូប្រជែងទីក្រុងឡុងដុង Tottenham ហើយកីឡាករវ័យ២៤ឆ្នាំ គឺជាអ្នកស៊ុតបញ្ចូលទីតែ១គ្រាប់គត់ ជួយឲ្យ Chelsea យកឈ្នះក្រុម West Ham ក្នុងការប្រកួត Premier League កាលពីយប់ថ្ងៃពុធដែរ។
ខ្សែប្រយុទ្ធ Harry Kane របស់ Tottenham ដែលស៊ុតឲ្យក្រុមមាន់ខ្នាយមាសបាន ២៤គ្រាប់ នៅរដូវកាលនេះ បានក្លាយជាកីឡាករវ័យក្មេងលេងបានល្អជាងគេប្រចាំឆ្នាំ។
ក្រៅពីកីឡាករទាំង២រូបនេះ ក៏នៅមានរង្វាន់ផ្សេងៗទៀតដែរដូចជា៖ អ្នកចាត់ការល្អប្រចាំឆ្នាំ បានទៅលើលោក Mark Warburton របស់ក្រុម Brentford។ អ្នកចាំទីល្អប្រចាំឆ្នាំ បានទៅលើ Thibaut Courtois របស់ Chelsea។ អ្នករួមចំណែកជួយដល់ក្លិបនាទីក្រុងឡុងដុង បានទៅលើលោក Arsene Wenger របស់ក្រុមកាំភ្លើងធំ Arsenal ផងដែរ៕
