ដោយ សារបញ្ហាសន្តិសុខ សុវត្ថិភាព សហព័ន្ធកីឡាបាល់ទាត់អន្តរជាតិ FIFA ដោយមានការសហការពីសហព័ន្ធកីឡាបាល់ទាត់ទ្វីបអាស៊ី AFC បានសម្រេចចិត្តផ្អាកការប្រកួតជម្រុះបឋមតំបន់អាស៊ី FIFA World Cup 2018 ជើងទី២ រវាងក្រុមប៉ាគីស្ថាន និងយេមែន ដែលគ្រោងនឹងលេងនៅទីក្រុង Lahore (ប៉ាគីស្ថាន) ល្ងាចនេះ។
យ៉ាងណាក្ដី មិនទាន់មានការបញ្ជាក់លម្អិត ក៏ដូចជាកំណត់ពេលប្រកួតសម្រាប់គូនេះនៅឡើយទេ គ្រាន់តែដឹងថាប្រកួតនៅលើទឹកដីកណ្ដាល។ លទ្ធផលកាលពីជើងទី១នៅទឹកដីយេមែន គឺម្ចាស់ផ្ទះយកឈ្នះប៉ាគីស្ថាន ៣-១។
ដូច្នេះការប្រកួតកាត់សេចក្ដីជើងទី២ថ្ងៃនេះ មានតែ៥គូប៉ុណ្ណោះ។ ក្រុមកម្ពុជា ដែលបានយកឈ្នះម៉ាកាវ ៣-០ លើដីខ្លួនឯងកាលពីជើងទី១ នឹងត្រូវដឹងជោគវាសនារបស់ខ្លួននៅលើកីឡដ្ឋាន Estádio Campo Desportivo របស់ម៉ាកាវនាម៉ោង៧យប់នេះ។ បើយោងតាមគេហទំព័រ FIFA បានឲ្យដឹងថាក្រុមទាំង២ សុទ្ធតែមិនធ្លាប់មានប្រវត្តិឆ្លងផុតវគ្គជម្រុះជុំដំបូងដូចគ្នា នាពេលកន្លងមក។
គេហទំព័រផ្លូវការដដែល បានចាត់ទុក ខ្សែប្រយុទ្ធ ចាន់ វឌ្ឍនាកាជា កីឡាករគួរឲ្យចាប់អារម្មណ៍ជាងគេសម្រាប់វគ្គជម្រុះជើងទី២នេះ ក្រោយពីកីឡាករនៃក្លិបបឹងកេតអង្គររូបនេះ ស៊ុតបញ្ចូលទីបាន២គ្រាប់ក្នុងនាមជាកីឡាករបម្រុងកាលពីជើងទី១។ យ៉ាងណាក្ដី FIFA ក៏បានបញ្ជាក់ដែរថា ក្រុមកម្ពុជាមិនទាន់អាចជិះសេះលែងដៃបាននោះទេ ទោះមាន៣គ្រាប់ក្នុងដៃក៏ដោយ ដោយសារតែកាលពីវគ្គជម្រុះ World Cup 2014 ក្រុមនេះត្រូវធ្លាក់ដោយសារចាញ់ឡាវនៅក្រៅផ្ទះដល់ទៅ ៦-២ ទោះបីយកឈ្នះ ៤-២ ក្នុងដីខ្លួនឯងក៏ដោយ។
ចំណែកឯឥណ្ឌា និងទីម័រខាងកើត សុទ្ធតែធ្វើបានល្អនៅផ្ទះខ្លួនឯងកាលពីជើងទី១ដូចកម្ពុជាដែរ។ ក្រុមទាំង២ នឹងធ្វើដំណើរទៅប្រកួតជើងទី២ នៅក្រៅដីប្រកបដោយទំនុកចិត្ត ពោលគឺ ឥណ្ឌា ត្រូវទៅផ្ទះអ្នកជិតខាង នេប៉ាល់ នាម៉ោង៤:៤៥នាទីល្ងាច (ម៉ោងនៅកម្ពុជា) ខណៈទីម័រខាងកើត ដែលឈ្នះម៉ុងហ្គោលី ៤-១ លើដីខ្លួនឯង នឹងត្រូវទៅទៅកីឡដ្ឋានជាតិរបស់ម៉ុងហ្គោលីវិញនាម៉ោង៣រសៀល។ ទាំងម៉ុងហ្គោលី ទាំងទីម័រខាងកើត សុទ្ធតែមិនធ្លាប់ឆ្លងផុតជុំដំបូង ដូចម៉ាកាវ និងកម្ពុជាដែរ។
រីឯ២គូទៀត ដែលត្រូវបាន FIFA ចាត់ទុកថាជាជំនួបដ៏តានតឹងនោះ គឺប្រ៊ុយណេ ទទួលភ្ញៀវ តៃវ៉ាន់ និងប៊ូតាន់ ស្វាគមន៍ក្រុមស្រីលង្កា។ ក្រុមម្ចាស់ផ្ទះប្រ៊ុយណេ និងប៊ូតាន់ សុទ្ធតែបង្កភាពភ្ញាក់ផ្អើលដោយឈ្នះ ១-០ ទាំងប្រផុតប្រផើយនៅក្រៅដីដូចគ្នាកាលពីជើងទី១។ តើក្រុមទាំង២ អាចទប់ក្រុមភ្ញៀវជាប់ដែរឬទេ នៅលើដីខ្លួនឯងនាជើងទី២នេះ។ ក្រុមប្រ៊ុយណេដែលមិនធ្លាប់ឆ្លងផុតវគ្គជម្រុះជុំដំបូងនោះ នឹងត្រូវបើកទ្វារកីឡដ្ឋាន Sultan Hassanal Bolkiah របស់ខ្លួន ស្វាគមន៍ក្រុមតៃវ៉ាន់ នាម៉ោង ៧:១៥នាទីយប់ ខណៈក្រុមបាតតារាង FIFA Raking ប៊ូតាន់ ដែលមិនធ្លាប់បង្ហាញខ្លួននាវគ្គជម្រុះកន្លងមកនោះ នឹងត្រូវទទួលភ្ញៀវស្រីលង្កា នាម៉ោង៥ល្ងាច។
ការប្រកួតរវាងប៊ូតាន់ (ស) និងស្រីលង្កា កាលពីជើងទី១
កីឡាករប្រធានក្រុមកម្ពុជា ឃួន ឡាបូរ៉ាវី (កណ្ដាល) អបអរក្រោយស៊ុតបញ្ចូលទីម៉ាកាវ ជើងទី១
រំលឹកលទ្ធផលកាលពីជើងទី១
