Cristiano Ronaldo អាចនឹងត្រលប់ទៅក្លិប Manchester United វិញនៅពេលខាងមុខនេះ ប្រសិនបើស្ថានភាពនៅក្លិប Real Madrid នៅតែមិនល្អប្រសើរទេនោះ។ នេះបើយោងតាមការចុះផ្សាយរបស់ Daily Mail។
Ronaldo តាំងពីត្រូវពិន័យ២ប្រកួតមក ហាក់មិនសប្បាយចិត្តសោះនៅ Real Madrid ខណៈដែលអ្នកគាំទ្រមួយចំនួនវិញគឺរឹតតែមួម៉ៅថែមទៀតដោយសារកំពូល ខ្សែប្រយុទ្ធខាងលើនេះមានទម្រង់លេងមិនល្អដូចកាលមុនឡើយ។ កត្តាមួយផ្សេងទៀត ដែលធ្វើឱ្យកៅអីរបស់ Cr7 កាន់តែក្ដៅឡើងនោះ គឺរឿងដែលរូបគេទៅចូល Karaoke ក្រោយចាញ់ក្រុម Atletico Madrid យ៉ាងចាស់ដៃ ៤-០។
យ៉ាងណាមិញ ក្រោយពីមានរឿងបន្តបន្ទាប់មកនេះ ម្ចាស់ក្លិប Real Madrid លោក Florentino Perez ក៏បាននិយាយដែរថារូបលោកអាចនឹងលក់ម្ចាស់ពាន Ballon d’Or ៣សម័យរូបនេះចេញប្រសិនបើមានក្លិបណាហ៊ានឱ្យតម្លៃខ្លួនខ្ពស់ អាចទទួលយកបាន។ មួយវិញទៀត លោក Sir Alex ដែលជាមនុស្សស្និទ្ធនឹង Ronaldo មែនទែននោះ ក៏មានវត្តមាននៅអេស្ប៉ាញដែរនៅពេលថ្មីៗនេះ ទើបធ្វើឱ្យគេអាចសន្និដ្ឋានបានថាមិនយូរមិនឆាប់ទេ ខ្សែប្រយុទ្ធវ័យ៣០ឆ្នាំរូបនេះនឹងអាចត្រលប់ទៅទ្រនំចាស់វិញហើយ។
លើសពីនេះទៅទៀត បិសាចក្រហមមិនត្រឹមតែចង់បានខ្សែប្រយុទ្ធជម្រើសជាតិព័រទុយហ្គាល់ ត្រលប់មកវិញទេ លោក Van Gaal ក៏មានជម្រើសមួយទៀតដែរគឺ Gareth Bale ។ ខ្សែប្រយុទ្ធសញ្ជាតិវែល វ័យ២៥ឆ្នាំរូបនេះជាកីឡាករដែល Man Utd ចង់បានតាំងពីខែមករាមកម្ល៉េះ ប៉ុន្តែរូបគេតែងតែបដិសេធត្រលប់មកអង់គ្លេសវិញរហូត ហើយថែមទាំងនិយាយទៀតថា Real Madrid ជាក្លិបល្អបំផុតសម្រាប់ខ្លួន។
ទោះជាយ៉ាងនេះក្ដី ទីផ្សារដោះដូរកីឡាករបើកនៅរដូវក្ដៅខាងមុខឯណោះ ពោលគឺពេលចប់រដូវកាលនេះ ដូច្នេះនៅមានពេលច្រើនទៀតដើម្បីតាមដានស្ថានការណ៍នេះក៏ដូចជាការ វិវឌ្ឍនៃទម្រង់លេងនិងទឹកចិត្តអ្នកគាំទ្ររបស់ Real Madrid ទាំងអស់៕
