ចំណូល របស់អ្នកចាត់ការក្រុមបាល់ទាត់ ឬគ្រូបង្វឹកក្រុមបាល់ទាត់ជម្រើសជាតិ គឺអាស្រ័យទៅលើស្នាដៃ និងសមិទ្ធផលដែលធ្លាប់ដឹកនាំក្រុមកន្លងមក ទើបអាចក្លិបធំៗ ឬក្លិបអ្នកមានហ៊ានឲ្យតម្លៃខ្លួនទៅតាមទិដ្ឋភាពជាក់ស្ដែង។
ចង់ដឹងថា តើអ្នកចាត់ការ ឬគ្រូបង្វឹករូបណា ដែលមានចំណូលច្រើនជាងគេ នៅរដូវកាល២០១៤/១៥ នេះដែរទេ? Sabay សូមបង្ហាញជូន ៧នាក់ដូចខាងក្រោម៖
១. Pep Guardiola – Bayern Munich (២៤លានដុល្លារ)
អ្នកចាត់ការវ័យ ៤៤ឆ្នាំរូបនេះ ធ្លាប់ដឹកនាំក្រុម FC Barcelona ឲ្យលើកពានសរុបចំនួន ១៤លើក។ តាំងពីឡើងមកដឹកនាំក្រុមអាល្លឺម៉ង់ Bayern Munich ឆ្នាំ២០១៣មក បុរសសញ្ជាតិអេស្ប៉ាញរូបនេះ បានជួយឲ្យ Bayern ឈ្នះពានផ្សេងៗគ្នាចំនួន៤ហើយ។
២. Jose Mourinho – Chelsea (១៧លានដុល្លារ)
អ្នកចាត់ការវ័យ ៥២ឆ្នាំរូបនេះ ធ្លាប់ដឹកនាំក្រុម Porto ឈ្នះពានសរុបចំនួន៦, ជួយឲ្យក្រុម Inter Milan ឈ្នះពានសរុប៥, ជួយឲ្យ Real Madrid ឈ្នះពានចំនួន៣ និងជួយឲ្យក្រុមតោខៀវ Chelsea លើកពានសរុបទាំងអស់ចំនួន៧ដង។
៣. Marcello Lippi – Guangzhou Evergrande (១៤លានដុល្លារ)
អ្នកចាត់ការវ័យ ៦៦ឆ្នាំរូបនេះ ធ្លាប់ដឹកនាំក្រុម Juventus ឲ្យលើកពានចំនួន១៤ដង និងល្បីខ្លាំងកាលលោកជួយឲ្យក្រុមជម្រើសជាតិអ៊ីតាលីលើកពាន World Cup កាលពីឆ្នាំ២០០៦។ តាំងពីទៅដឹកនាំក្រុមចិន Guangzhou Evergrande តាំងពីឆ្នាំ២០១២មក លោក Lippi បានជួយឲ្យក្រុមខ្លាំងរបស់ចិនមួយនេះ លើកពានសរុបបាន៥ដង។
៤. Fabio Capello – ក្រុមជម្រើសជាតិរុស្សី (១៣លានដុល្លារ)
គ្រូបង្វឹកវ័យ ៦៨ឆ្នាំរូបនេះ ធ្លាប់ដឹកនាំក្រុម AC Milan ឲ្យលើកពានសរុបបាន៩ដង, ជួយឲ្យ Real Madrid ឈ្នះ La Liga បាន២ដង, និង Roma ឈ្នះពាន២ផ្សេងគ្នា។ ប៉ុន្តែអតីតគ្រូបង្វឹកក្រុមជម្រើសជាតិអង់គ្លេសរូបនេះ ពុំទាន់ដឹកនាំក្រុមជម្រើសជាតិណាមួយ ឲ្យឈ្នះពាននៅឡើយទេ។
៥. Louis van Gaal – Manchester United (១១.៧៥លានដុល្លារ)
អ្នកចាត់ការវ័យ ៦៣ឆ្នាំរូបនេះ ធ្លាប់ដឹកនាំក្រុម Ajax ឲ្យឈ្នះពានសរុបចំនួន១១ដង, ជួយ Barcelona ឲ្យឈ្នះពានសរុបចំនួន៤ដង, AZ Alkmaar ឈ្នះពាន១ដង, Bayern Munich ឈ្នះពាន៣ដង និងជួយឲ្យក្រុមជម្រើសជាតិហុល្លង់ ទទួលបានចំណាត់ថ្នាក់លេខ៣ នៅ World Cup ឆ្នាំ២០១៤។
៦. Carlo Ancelotti – Real Madrid (១០.៥លានដុល្លារ)
អ្នកចាត់ការវ័យ ៥៥ឆ្នាំរូបនេះ ធ្លាប់ដឹកនាំក្រុម Juventus ឲ្យឈ្នះពានបាន១ដង, AC Milan ឈ្នះពានសរុប៨ដង, Chelsea ឈ្នះពាន៣ផ្សេងគ្នា, PSG ឈ្នះពានក្នុងលីកបាន១ដង។ តាំងពីទៅដឹកនាំក្រុមអធិរាជសនៅអេស្ប៉ាញ លោក Ancelotti បានជួយឲ្យ Real Madrid លើកពានបានចំនួន៤ផ្សេងគ្នា។
៧. Arsène Wenger – Arsenal (១០លានដុល្លារ)
អ្នកចាត់ការវ័យ ៦៥ឆ្នាំរូបនេះ ធ្លាប់ដឹកនាំក្រុម Monaco ឲ្យឈ្នះពានចំនួន២ផ្សេងគ្នា និងជួយឲ្យក្រុមជប៉ុន Nagoya Grampus ឈ្នះពានចំនួន២ដង។ តាំងពីឡើងដឹកនាំក្រុម Arsenal ឆ្នាំ១៩៩៦មក លោក Wenger បានជួយឲ្យក្រុមកាំភ្លើងធំ លើកពានសរុបទាំងអស់បានចំនួន ១៣ដងហើយ៕