Cristiano Ronaldo បានស៊ុតបញ្ចូលទីគ្រាប់ទី៣០ប្រចាំ La Liga រដូវកាលនេះ ប៉ុន្តែមិនអាចជួយឲ្យក្រុម Real Madrid ទទួលបាន៣ពិន្ទុនោះទេ ក្រោយបានត្រឹមស្មើ ១-១ ទល់នឹងក្រុម Villarreal យប់មិញ។
ទោះសល់១២ប្រកួតទៀតទើបចប់រដូវកាលក្ដី ក៏ម្ចាស់ពានកីឡាករល្អបំផុតក្នុងលោករូបនេះ នៅសល់តែ១គ្រាប់ទៀតប៉ុណ្ណោះ នឹងតាមស្មើចំនួនគ្រាប់បាល់ស៊ុតបញ្ចូលទីពេញមួយរដូវកាលមុនហើយ (៣១គ្រាប់)។ យ៉ាងណាក្ដីរូបគេហាក់មិនសប្បាយចិត្តនោះឡើយ ក្រោយបាត់បង់២ពិន្ទុទាំងគួរឲ្យសោកស្ដាយ។ លទ្ធផលនេះ មានន័យថា Real នាំមុខគូប្រជែងលេខ២ Barcelona តែ២ពិន្ទុប៉ុណ្ណោះ ខណៈក្រុមទាំង២នឹងត្រូវប៉ះគ្នានៅកីឡដ្ឋាន Camp Nou នាចុងខែនេះ។
ងាកមកមើលការប្រកួតវិញ ១គ្រាប់នាំមុខរបស់ក្រុមម្ចាស់ផ្ទះ Real Madrid ធ្វើបានសម្រេចដោយការស៊ុតបាល់ពិន័យ១១ម៉ែត្រនៅនាទី៥២ ដោយ Ronaldo ក្រោយកីឡាករព័រទុយហ្គាល់រូបនេះ ត្រូវ Eric Bailly បង្កកំហុសក្នុងតំបន់គ្រោះថ្នាក់។ យ៉ាងណាក្ដី Villarreal បានវាយបកតាមស្មើវិញនៅនាទី៦៤ ដោយការស៊ុតរបស់កីឡាករវ័យ២២ឆ្នាំ Gerard Moreno។ នៅក្នុងការប្រកួតទាំងមូល ក្រុមលោក Carlo Ancelotti អាចលេងបានយ៉ាងល្អ ដោយអាចគ្រប់គ្រងបាល់បានដល់ទៅ៦២ភាគរយ និងស៊ុតដល់ទៅ២៥ដង។
ចំណែកឯលោក Ancelotti វិញក្រោយចប់ការប្រកួតក៏បាននិយាយដែរថា៖ “យប់មិញក្រុមយើងមានទម្រង់លេងល្អណាស់ តែយើងមិនមានសំណាងក្នុងការរកគ្រាប់បាល់បាន។ យ៉ាងណាមិញយើងនៅតែឈរនៅចំណាត់ថ្នាក់លេខ១ដដែល ដូច្នេះប្រកួតក្រោយៗទៀត យើងត្រូវតែព្យាយាមជាងនេះទៀត”។
