អ្នកចាំទី Thibaut Courtois របស់ក្រុម Chelsea បានបង្ហើបប្រាប់ឲ្យដឹងថា អតីតអ្នកចាំទីក្រុម Manchester United កីឡាករ Edwin Van der Sar គឺជា «និមិត្តរូប» របស់គេ។
ក្នុងឱកាសសំនួរចម្លើយជាមួយនឹងគេហទំព័រ Champions League Twitter កីឡាករវ័យ២២ឆ្នាំ Courtois បានប្រាប់ឲ្យដឹងថា រូបគេតែងតែមើលអតីតអ្នកចាំទីជម្រើសជាតិហុល្លង់ Van der Sar ជានិច្ច និងតែងស្រមៃចង់ធ្វើឲ្យបានល្អដូចអ្នកចាំទីរូបនោះ។
Courtois គឺជាអ្នកចាំទីវ័យក្មេងដ៏ល្អបំផុតម្នាក់នាពេលបច្ចុប្បន្ន ខណៈដែលកីឡាកររូបនេះ នៅតែបង្ហាញទម្រង់លេងបានយ៉ាងល្អឥតខ្ចោះឲ្យក្រុមតោខៀវ។
អ្នកចាំទីដៃទី១ជម្រើសជាតិបែលហ្សិក បានលេងឲ្យក្រុម Atletico Madrid លក្ខណៈខ្ចីជើងអស់រយៈពេល៣ឆ្នាំ នៅក្នុងក្របខ័ណ្ឌ La Liga របស់អេស្ប៉ាញ មុននឹងត្រឡប់មកប្រជែងយកដំណែងដៃទី១ ពីអ្នកចាំទី Petr Cech នៅ Chelsea វិញ។
ចំណែកឯ Van der Sar ជាអតីតអ្នកចាំទីដែលបានប្រកាសចូលនិវត្តន៍តាំងពីឆ្នាំ២០១១ ក្រោយឈ្នះពានរង្វាន់ជាច្រើនដូចជា ពានរង្វាន់ក្នុងលីកបានចំនួន៨លើក, Champions Leagues ចំនួន២លើក, FIFA Club World Cup ចំនួន១លើក និងពានរង្វាន់ផ្សេងៗមួយចំនួនទៀត៕
