លោក Diego Simeone អ្នកចាត់ការក្រុម Atletico Madrid បានបញ្ជាក់ពីអារម្មណ៍លោកថា ខ្សែប្រយុទ្ធ Lionel Messi ពិតជាពិបាកការពារ និងគ្រោះថ្នាក់ជាងខ្សែប្រយុទ្ធ៣នាក់របស់ Real Madrid បូកបញ្ចូលគ្នាទៅទៀត គឺ Cristiano Ronaldo បូក Gareth Bale និង Karim Benzema។
បន្ទាប់ពីមិនអាចយកឈ្នះ Barcelona បាននៅក្នុងពានរង្វាន់ Copa del Rey កាលពីម្សិលមិញ លោក Diego Simeone បានប្រាប់ពីទម្រង់លេងរបស់ Messi ថា៖ “ខ្ញុំធ្លាប់បានដឹកនាំ Atletico Madrid ប្រកួតជាមួយ Real Madrid និង Barcelona អស់ហើយ ប៉ុន្តែយើងមិនអាចយក Ronaldo ទៅប្រៀបជាមួយ Messi បាននោះទេ។ Messi តែម្នាក់ឯង គឺខ្លាំង និងគ្រោះថ្នាក់ជាងខ្សែប្រយុទ្ធទាំង៣នាក់របស់ Real Madrid កីឡាករ Ronaldo + Bale + Benzema បូកបញ្ចូលគ្នាឆ្ងាយណាស់”។ បន្ថែមពីលើនេះ អ្នកចាត់ការវ័យ៤៤ឆ្នាំខាងលើក៏បន្ថែមទៀតថាទម្រង់លេង Messi កាន់តែល្អនៅពេលគេលេងស្លាបស្ដាំជាជាងនៅកណ្ដាល។
ម្ចាស់ពានរង្វាន់ FIFA Ballon d’Or ៤សម័យកាល ត្បិតតែមិនបានរកគ្រាប់បាល់ក្នុងប្រកួតដែល Barcelona ឈ្នះ Atletico Madrid ៣-២ មែន ប៉ុន្តែគ្រាប់បាល់ដំបូង Barca រកបានក្នុងប្រកួតនោះគឺចេញមកពី Messi នេះឯង ខណៈដែលគ្រាប់បាល់ចុងក្រោយវិញក៏មកពីវត្តមានខ្សែប្រយុទ្ធវ័យ២៧ឆ្នាំនេះដែរ ទើបធ្វើឱ្យខ្សែការពារ At Madrid ធ្វេសប្រហែសមិនបិទ Neymar ។ នេះជាសម្ដីចុងក្រោយរបស់លោក Simeone ។
ចុះចំពោះគំនិតរបស់មិត្តអ្នកអានវិញ តើគិតថាទម្រង់លេងរបស់ Messi នាពេលបច្ចុប្បន្ននេះពិតជាល្អខ្លាំងដូចដែលអ្នកចាត់ការក្រុម Atletico Madrid ខាងលើបាននិយាយឬក៏អត់ (Messi ខ្លាំងជាង Ronaldo + Bale + Benzema) ?
