បន្ទាប់ ពីបទ “ខ្ញុំមិនសុខចិត្តទេ” និង “យល់សប្ដិយល់សូង”តារាចម្រៀងកូនខ្មែរ-អាមេរិក ឡូរ៉ា ម៉ម បានបញ្ចេញបទចម្រៀងថ្មីមួយទៀតហើយ ជាចង្វាក់ម៉ាឌីហ្សុនសម្រាប់រាំលេងសប្បាយៗក្នុងឱកាសបុណ្យចូល ឆ្នាំខ្មែរប្រពៃណីជាតិ នាពេលខាងមុខ។
ឡូរ៉ា កំពុងផ្ដល់បទសម្ភាសន៍ជាមួយ Sabay
បទថ្មី មានចំណងជើងដូចនឹងចង្វាក់តែម្ដងគឺ “ម៉ាឌីហ្សុនថ្មី” ត្រៀមនឹងចេញប៉ុន្មានថ្ងៃខាងមុខនេះលើប្រព័ន្ធ YouTube។ បទនេះ ឡូរ៉ា បានយកផ្នែកខ្លះ នៃបទចាស់ ក្នុងនោះ គឺនាងយកតែសំឡេងហ្គីតាប៉ុណ្ណោះ ប៉ុន្តែ ក្រៅពីនេះ គឺធ្វើថ្មីទាំងអស់។ “ខ្ញុំបានធ្វើវាពិសេសតែម្ដងសម្រាប់ពុកម៉ែបងប្អូនរាំលេង សប្បាយ!”។ ឡូរ៉ា ថ្លែង។
“ម៉ាឌីហ្សុន” គឺជាចង្វាក់មួយក្នុងចំណោមចង្វាក់ នៃបទភ្លេងជាច្រើនដែលមានក្នុងបទចម្រៀងខ្មែរ មានដូចជា រាំវង់ រាំក្បាច់ សារ៉ាវ៉ាន់ និង លាំឡាវ ជាដើម។ យ៉ាងណា ឡូរ៉ា ជ្រើសរើសយកចង្វាក់នេះ ធ្វើជាស្នាដៃថ្មីរបស់នាង ក៏ព្រោះតែនាងកត់សម្គាល់ឃើញថា “ម៉ាឌីហ្សុន” ជាចង្វាក់មួយដែលបងប្អូនប្រជាពលរដ្ឋខ្មែរនិយមចូលចិត្តរាំលេង បំផុត។
ឡូរ៉ា ថ្លែងបន្តថា “ចំពោះខ្ញុំ គឺខ្ញុំចូលចិត្ត ម៉ាឌីហ្សុនមែនទែន ម្យ៉ាងប្រសិនបើយើងមើលពីប្រវត្តិ ម៉ាឌីហ្សុន គឺមកពីស្រុកអាមេរិក ជំនាន់ ៦០ តែមកទល់រាល់ថ្ងៃនៅស្រុកអាមេរិក អត់មានអ្នកណាស្គាល់ អ្នកណាចាំម៉ាឌីហ្សុនទេ។ អីចឹងពិសេសមែនទែនសម្រាប់ស្រុកខ្មែរយើងដែលនៅមាន។ ទី២ខ្ញុំឃើញថា បងប្អូនយើងលោកយាយលោកតាចូលចិត្តរាំបទនេះណាស់ ហើយវាប្លែកមែនទែនពីរាំវង់អី គឺយើងរាំទៅសប្បាយ ហើយវាជា Symbol ល្អមែនទែនសម្រាប់ស្រុកខ្មែរ”។
គិតមកទល់ពេលនេះ “ម៉ាឌីហ្សុនថ្មី” គឺជាបទចម្រៀងចង្វាក់ម៉ាឌីហ្សុនដំបូងដែលតារាចម្រៀងកូនកាត់រូប នេះបានធ្វើ ចាប់តាំងពីនាងបានផ្លាស់លំនៅពីសហរដ្ឋអាមេរិកមកកម្ពុជាកាលពីចុង ឆ្នាំ ២០១៣។ ទោះយ៉ាងនេះក្ដី មានចំណុចមួយដែលដូចគ្នានឹងបទមុន គឺ ឡូរ៉ា តែងតែបញ្ចូលសិល្បៈបុរាណ។ ចំណុចនេះ តារាចម្រៀងវ័យ ២៨ ឆ្នាំ រូបនេះ ថ្លែងថា ទី ១ នាងចង់បន្ថែមរសជាតិ ប៉ុន្តែសំខាន់នាងចង់បណ្ដុះស្មារតីយុវវ័យឲ្យចេះស្រឡាញ់ និង ដឹងពីសក្ដានុពលរបស់សិល្បៈបុរាណខ្មែរយើង។
“ភាគច្រើនខ្ញុំមើលឃើញថា យុវវ័យយើងចូលចិត្តមើលទៅក្រៅប្រទេស អំពីអ្វីដែលគេថាឡូយ ដូចជា ស្រុកកូរ៉េ ស្រុកអាមេរិក ប៉ុន្តែតាមជំនឿខ្ញុំ ខ្ញុំគិតថា ខ្មែរយើងឡូយជាងគេទាំងអស់ យើងមានសិល្បៈបុរាណ សម័យអីឡូយហើយ មិនចាំបាច់មើលទៅក្រៅប្រទេសទេ អីចឹងបើយើងធ្វើថ្មីដោយច្របាច់បញ្ចូលគ្នា ខ្ញុំគិតថាឡូយជាងគេទាំងអស់”។
បទចម្រៀង “ម៉ាឌីហ្សុនថ្មី” គឺជាចម្រៀងតែមួយបទគត់ ដែល ឡូរ៉ា ផ្ដល់ជាចំណងដៃសម្រាប់ឱកាសបុណ្យចូលឆ្នាំខ្មែរ។ ប៉ុន្តែ ឡូរ៉ា ប្រាប់ថា បន្ទាប់ពីបុណ្យជាតិដ៏ធំនេះទៅ នាងនឹងមានចំណងដៃបន្តបន្ទាប់ទៀត។ យ៉ាងណាក៏ដោយ ចំណងដៃក្រោយៗនេះ នាងនឹងវិលទៅរឿងស្នេហាម្ដង៕
សកម្មភាព ឡូរ៉ា និងក្រុមការងាររាំចង្វាក់ម៉ាឌីហ្សុន ថត MV កាលពីសប្ដាហ៍មុន
