ក្លិប តោខៀវ Chelsea កំពុងតែចាប់អារម្មណ៍ចង់ទិញយក Antoine Griezmann របស់ក្លិប Atletico Madrid បន្ទាប់ពីឮថាតម្លៃផ្តាច់កុងត្រាខ្សែប្រយុទ្ធវ័យ២៤ឆ្នាំរូបនេះ ប្រហែល៤៣លានផោន (ជិត៦៦លានដុល្លារ)។
អ្នកចាត់ការ Diego Simeone មិនចង់ឲ្យកីឡាករឆ្នើមរបស់លោក ដែលនៅជាប់កុងត្រាដល់ឆ្នាំ២០២០ ចាកចេញទេ ប៉ុន្តែពេលនេះអ្នកចាត់ការវ័យ៤៥ឆ្នាំ អាចនឹងពិបាករក្សាទុក Griezmann ទៀត ព្រោះក្លិប Chelsea ក៏ចាប់អារម្មណ៍ ហើយ Bayern Munich ក៏ចង់បានកីឡាករជម្រើសជាតិបារាំងរូបនេះ ទៅជំនួសតំណែង Franck Ribery ផងដែរ។
ប្រភពមួយមកពីក្លិប Atletico បានឲ្យដឹងថា Griezmann មានទំនាក់ទំនងយ៉ាងល្អជាមួយនឹងអ្នកចាត់ការ Simeone បើទោះបីជាត្រូវដូរចេញ ក្នុងការប្រកួត Champions League វគ្គ៨ក្រុមចុងក្រោយ ចាញ់ Real Madrid ក៏ដោយ ហើយអ្នកចាត់ការសញ្ជាតិអាហ្សង់ទីនរូបនេះ កំពុងតែសុំឲ្យក្លិបបន្តពង្រីកកិច្ចសន្យាថ្មីទៀត ខណៈដែលអ្នកគាំទ្រក៏មិនចង់បាត់បង់ខ្សែប្រយុទ្ធឆ្នើមរូបនេះ ពីកីឡដ្ឋាន Vicente Calderón ដូចគ្នា។
Griezmann ស៊ុតបាន២២គ្រាប់ហើយ ក្នុងលីកនៅរដូវកាលនេះ ហើយបានជាប់កំណត់ត្រាក្នុងប្រវត្តិសាស្ត្របាល់ទាត់អេស្ប៉ាញ La Liga ដោយក្លាយជាកីឡាករបារាំង ដែលស៊ុតបញ្ចូលទីបានច្រើនជាងគេក្នុង១រដូវកាល និងបានបំបែកកំណត់ត្រាចាស់របស់ Zinedine Zidane និង Thierry Henry ប៉ុន្តែនៅស្មើជាមួយ Karim Benzema ដែលធ្លាប់ស៊ុតបាន២២គ្រាប់ដែរ កាលពីរដូវកាល ២០១០-២០១១៕
