នៅ ម៉ោង ១:៤៥នាទីរំលងអាធ្រាត្រនេះ ក្រុម Real Madrid នឹងត្រូវទទួលក្រុម Atletico Madrid ដែលជាក្រុមមិនចាញ់ Real ឡើយក្នុងការប៉ះគ្នា៧ប្រកួតចុងក្រោយ។ ក្រុមម្ចាស់ពានរង្វាន់ទ្វីបអឺរ៉ុប ១០សម័យ ត្រូវបានគេមើលឃើញថាអាចនឹងមានការពិបាកទៀតក្នុងការយកឈ្នះ AT Madrid នាការប៉ះគ្នាលើកនេះ ព្រោះអវត្តមានកីឡាករសំខាន់ដល់ទៅ៤នាក់គឺ Marcelo , Luka Modric , Karim Benzema និង Gareth Bale ។
ប៉ុន្តែបើងាកទៅមើលកំណត់ត្រារដូវកាលនេះដែលស្ដេចសអត់មាន Bale ចូលលេងវិញ ប្រហែលជាអាចធ្វើឱ្យអ្នកគាំទ្រសប្បាយចិត្តបន្តិច ព្រោះមិនដែលចាញ់ និងស្មើនោះទេ ពោលគឺអវត្តមាន៧ប្រកួត ឈ្នះទាំង៧ប្រកួតតែម្ដង។ មិនត្រឹមតែឈ្នះនោះទេ អវត្តមានអតីតកីឡាករ Spurs រូបនេះកន្លងមក Real ក៏ធ្វើបានល្អណាស់ដែរ ដោយ៧ប្រកួតនោះរកគ្រាប់បាល់បាន២៧គ្រាប់ឯណោះ ។ នេះមានន័យថាមួយប្រកួតអាចរកគ្រាប់បាល់បានជាមធ្យមដល់ទៅជិត៤ គ្រាប់ (៣,៩)។
ទោះជាយ៉ាងណាក្ដីនេះគ្រាន់តែជាស្ថិតិប្រកួតមុនៗប៉ុណ្ណោះ ចាំមើលប្រកួតយប់នេះទើបអាចដឹងច្បាស់ថាអត់មាន Bale ក្រុម Real Madrid នៅតែធ្វើបានល្អខ្លាំងឬយ៉ាងណា?
