អ្នកចាត់ការ ក្រុម Chelsea លោក Jose Mourinho បានលើកឡើងថា បើក្រុម Real Madrid ចង់បាន Eden Hazard មែននោះ ទាល់តែក្លិបអេស្ប៉ាញហ៊ានឲ្យតម្លៃជើងរបស់ Hazard ម្ខាងតម្លៃ១០០លានផោន ហើយថែម Cristiano Ronaldo ឬ Gareth Bale ម្នាក់ទៀត។
ការនិយាយរបស់អ្នកចាត់ការសញ្ជាតិព័រទុយហ្គាល់ដូចនេះ គឺបន្ទាប់ពី Zinedine Zidane បង្ហើបកាលពីសប្ដាហ៍មុនថាលោកពេញចិត្តខ្សែបម្រើបែលហ្សិក Hazard យ៉ាងខ្លាំង ដែលធ្វើឲ្យលោក Mourinho ជឿថាប្រហែលជាការបោះសម្ដីចង់ទាក់ទាញកីឡាករឆ្នើមរបស់លោកទៅកាន់ ក្លិប Real Madrid។
យ៉ាងណាក្ដី អ្នកចាត់ការវ័យ៥២ឆ្នាំ ជឿថា Hazard ដែលទើបតែបន្តកុងត្រាថ្មី៥ឆ្នាំកន្លះ កាលពី២ខែមុន នឹងមិនចាប់អារម្មណ៍ទៅលើការផ្ទេរចេញពីក្លិបតោខៀវឡើយ ខណៈដែលលោកនិយាយបកទៅ Real វិញថា៖ “បើ Real ចង់បានបេក្ខភាពដែលអាចនឹងឈ្នះពាន PFA Player of the Year របស់ខ្ញុំ (Hazard) ទាល់តែហ៊ានឲ្យតម្លៃជើងម្ខាង១០០លានផោន ហើយថែមកីឡាករឆ្នើមរបស់ Real ទាំង៣ ម្នាក់ទៀត ព្រោះ Hazard នៅក្មេងណាស់”។
