ក្រុម Real Madrid មានទំនុកចិត្តថានឹងអាចនាំយកអ្នកចាំទីដៃស្អិត David de Gea ពី Manchester United បាន ប្រសិនបើពួកគេពិតជាចង់បានមែននោះ ព្រោះកីឡាករវ័យ២៤ឆ្នាំរូបនេះធ្លាប់ប្រាប់មិត្តភ័ក្ដិថា គេមិនចោលឱកាសទៅលេងនៅ Real ឡើយ។
យោងតាម Sportsmail បញ្ជាក់ថា De Gea បាននិយាយជាមួយមិត្តភ័ក្ដិរបស់គេតាំងពីឆ្នាំមុនមកម៉្លេះ ថាមិនបោះបង់ឱកាសទៅលេងនៅ Real Madrid ទេ ប្រសិនបើក្លិបយក្សមួយនេះផ្ដល់ឱកាសឱ្យគេក្លាយជាអ្នកចាំទីដៃ ទីមួយនៅទីនោះ។
អ្នកចាំទីជម្រើសជាតិអេស្ប៉ាញខាងលើនេះ នឹងអស់កុងត្រានៅ Old Trafford នៅរដូវកាលក្រោយ ហើយលោក Louis van Gaal ក៏បាននិយាយដែរថាខាងក្លិបនឹងបន្តកុងត្រាថ្មីជាមួយគេទៀត។ ទោះជាយ៉ាងនេះក្ដី រឿងដែលផ្លាស់ទៅ Real Madrid នៅរដូវកាលក្រោយនេះនៅតែមានដដែល ព្រោះថាការស្នើកុងត្រាថ្មីរបស់ Man Utd ធ្លាប់ធ្វើឡើងតាំងពីរដូវកាលមុនមកម្ល៉េះ តែនៅមិនឃើញមានលទ្ធផលអ្វីនោះទេ៕
