ខ្សែ ប្រយុទ្ធ Zlatan Ibrahimovic មានជំនឿចិត្តថាក្រុម Barcelona មានសមត្ថភាពគ្រប់គ្រាន់ក្នុងការឈ្នះពានរង្វាន់ UEFA Champions League រដូវកាលនេះ ទោះជាទើបតែឈានដល់វគ្គពាក់កណ្ដាលផ្ដាច់ព្រ័ត្រក៏ដោយ។
Zlatan ជាខ្សែប្រយុទ្ធឆ្នើមរបស់ក្រុម Paris Saint Germain ដែលទើបតែត្រូវក្រុមអ្នកមានបុណ្យទម្លាក់ចេញពី Champions League ត្រឹមវគ្គ៨ក្រុមចុងក្រោយ។ ទោះជាមិនបានជួយក្រុមយក្សបារាំងឱ្យឈ្នះការប្រកួតក៏ដោយ ក៏កីឡាករវ័យ៣៣ឆ្នាំរូបនេះ មិនអន់ចិត្តអ្វីឡើយ ព្រោះរូបគេដឹងថាក្រុមលោក Luis Enrique មានកីឡាករល្អៗច្រើន ហើយមានសមត្ថភាពពិតប្រាកដ។ “យើងយល់ច្បាស់ ថាក្រុម Barcelona ពិតជាល្អជាងក្រុមយើងមែន។ ពួកគេជាក្រុមល្អមួយហើយពិតជាសក្ដិសមទទួលជ័យជម្នះ។ ពួកគេអាចនឹងឈ្នះពាន Champions League បានរដូវកាលនេះ បើមើលទៅទម្រង់លេងនាពេលបច្ចុប្បន្ននេះ”។ Zlatan និយាយ។
Barcelona មុនឡើងមកដល់វគ្គពាក់កណ្ដាលផ្ដាច់ព្រ័ត្រក្នុងពានរង្វាន់ UEFA Champions League នេះ ពួកគេបានបំបាក់ក្រុមខ្លាំងៗដូចជា Manchester City និង PSG ខាងលើនេះជាដើម។ ជុំបន្ទាប់ដែលសល់៤ក្រុមគឺ Barcelona , Real Madrid , Bayern Munich និង Juventus នឹងធ្វើការចាប់ឆ្នោតឱ្យដឹងថាក្រុមណាប៉ះក្រុមណានៅថ្ងៃសុក្រ ស្អែកនេះហើយ។
